Shillong, Jylliew 23
U Myntri Rangbah Conrad K Sangma ha ka sngi Ba-ar u la pynïaid ïa ka jingïalang bishar kam ha State Guest House, Taraghar, Shillong ban bishar ïa ki kam ba ïadei bad ka jingsam bording ilektrik, ka rukom ai bill bad ka jingud jingnam jong ki nongthang bording ha ki jaka bala pynïaid da ka SAI Computers hapoh ka jingpynbeit Distribution Franchisee jong ka Meghalaya Power Distribution Corporation Limited (MePDCL).
Ha kane ka jingïalang la wan ïashimbynta da u Chairman-cum-Mana-ging Director, MeECL, Sanjay Goyal, ki heh ophisar ka MePDCL, ki nongmihkhmat ka SAI Computers bad kiwei ki ophisar kiba don bynta ha ka kam.
Ha ka jingïalang, ka SAI Computers kala ai ïa ka jingbatai kaba bniah halor ka jinglong jingman jong ki kam ba ka pynïaid ha ki jaka ba aiwai sha ka (franchise area), haba pynpaw ïa ki jingeh kiba la ïoh pateng na ki rukom pynïaid ba hashuwa, kynthup ka jingbun ki meter kiba thut treikam, ki jingtei kiba la rim, ka jingsniew ki transformer, ki jingtan bording khlem meter, ka jingduna ha ka jingkheiñ ïa ki nongthang boding bad ki kam ba ïadei bad ka jingai bill.
Ki ophisar kila pyntip ïa u Myntri Rangbah ba ki bun bah na ki nongthang bording ha ki jaka ba aiwai (franchise area) kiba dei jong ka kyrdan Below Poverty Line (BPL) bad bun ki meter ha ki jaka ba dang aiti thymmai ki dei ki bym treikam shuh ha ka por ba shimti ban pynïaid ïa ka kam. Kila pynpaw ruh ba ki jingpyrshang kila ïaid shaid-shaid ban bujli ïa ki meter kiba la sniew, ban pynbha ïa ki jingtei ba ïadei bad ban weng ïa ki jingeh kiba la slem bha kiba kwah ïa ka jingsam bording.
Haba pynpaw ïa ka jingsngewkhia halor ki jingujor u paidbah ba ïadei bad ka bill bording ilektrik kaba heh bad ka jingbym thikna ka jingïoh bording, u Myntri Rangbah u la ban jur ba ka jingshaniah ki nongthang bording bad ka jingai jingshakri ka dei ka ban long ka ba kongsan tam.
“Ka bording ilektrik ka dei kawei na ki jingshakri paidbah kaba hap ban khmih bha namar ka ktah beit beit ïa ki longïing man la u bnai. Lada ki paidbah ki siew ïa ka bai bording kaba heh bad kim ïoh ïa ka bording kaba lah ban shaniah, kan don beit ka jingbym sngewtynnad. Ngi hap ban sngewthuh ïa ka jingsngewkhia jong u paidbah bad ban leh eiei mardor,” u la ong.
U Myntri Rangbah u la pynpaw ba katba ka Franchisee ka lah ban ïoh pateng ïa kiba bun ki jingeh na ki rukom pyntreikam, ki nongthang bording ki dei ban long kiba hakhmat eh haba khmih ïa ka rukom ai jingshakri kaba ki ïoh. Namar kata, u la bthah ïa ka SAI Computer bad ka MePDCL ban shim ïa ka lynti kaba kham phaikhmat sha ki nongthang bording haba pyntreikam ïa kino-kino ki jingpynkylla.
“Ki paidbah kim tip satia mano ba ïoh pateng ïa ki jingeh. Ki kwah ïa ka jingshakri kaba bha. Namar kata, ka jingpynleit jingmut ka dei ban long nyngkong eh ha ka ban pynbha ïa ka jingsam bording, bujli ïa ki transformer bad meter, bad pynkhlaiñ ïa ki jingtei. Shisien ba ki paidbah kila sdang ban ïohi ïa ka jingjanai, ka jingshaniah kan sa wan,” u la ong.
Haba kren halor ki jingujor ba ïadei bad ki jingïakren bad ki nongthang bording, u Conrad u la ban jur ïa ka jingdonkam ka jingïakren da ka akor ka burom bad ki paidbah bad kyntu ïa ka Franchisee ban pynkhlaiñ ïa ka jingïakren bad ka jingleit ïakynduh ïa ki nongthang bording.
“Ki briew jong ngi kiba shisur shidur. Lada phi kren ïa ki da ka akor ka burom, kin jubab ïa phi da kaba bha. Lada ka don ka jingbym ïasngewthuh, ka jingbym ïasngewthuh jingmut kan nang heh. Ban tei ïa ka jingshaniah bad ki nongthang bording ka dei kaba kongsan bha ha kane ka khyllipmat,” u la ong.
U Myntri Rangbah u la bthah ïa ka Franchisee ban leit pynlong ïa ki prokram pynsngewthuh paidbah sha kylleng ki jaka bad pynïadon bynta lang ïa ki nongïalam jong ki thaiñ, ki Nongmihkhmat Balang, ki Sengbhalang, ki Nonghikai bad ki kynhun bapher bapher ba kin batai ïa ki jingeh bala pynbeit, ka jingpynbha bala shim bad ka por bala buh ban pyntreikam. U la ai jingmut ruh ïa ka kompani ban pan ïa ka jingai jingmut u paidbah bad ban leh eiei ïa ki jingeh jong ki hapoh ka por kaba biang.
“To ngin pynbeit shuwa ïa ki jingeh. Ngi hap ban sngewthuh ïa ka jingsngewkhia u paidbah bad ban ïatreilang ban ai ïa ka jingshakri ba kham bha. Ngi dei kawei ka kynhun bad ka thong jong ngi ka long ban pynthikna ïa ka jingai bording kaba lah ban shaniah sha u paidbah,” u la ong.
U Myntri Rangbah u la kular ïa baroh ki kynhun ba don bynta ba ka Sorkar Jylla kan ïai bteng ban kyrshan ïa ka jingkynshew ha ki jingtei pynmih bording, kynthup ki sub-station, transformer, bad kiwei kiwei ki jingpynbha. U la pynpaw ba ka Sorkar ka ïai kut jingmut ban pynkhlain ïa ka kam pynmih bording bad pynthikna ba ki nongthang bording ki ïoh ïa ka bording ilektrik kaba shaniah bad kaba lah ban siew.
