Shillong, Jylliew 23
U MLA barim ka West Shillong, u Bah Mohendro Rapsang, u la wanphai biang sha ka saiñ pyrthei ha ka Sngi Ba-ar, hadien ba u la pynïasoh pura sha ka Bharatiya Janata Party (BJP), ha ryngkat ka kular ban trei minot na ka bynta ka roi ka par jong ka Jylla, hapoh ka jingïalam jong u Myntri Rangbahduh ka ri, u Narendra Modi.
U Bah Mohendro u la shah pdiang burom sha ka seng ha Shillong da u State-President ka BJP, u Rikman G. Momin bad u Myntri Sorkar, Bah Sanbor Shullai, ha ryngkat ka jingdonlang ki nongtrei ka seng bad ki dkhot Mandal.
Da kaba ñiew ïa kane kum ka sienjam kaba “donburom”, u Bah Mohendro u la ong ba ka rukom synshar jong u Modi ka la khring biang ïa u sha ka kam shakri paidbah.
“Nga sngew burom ban rung sha ka BJP mynta ka sngi bad ban ïeng hapdeng ki rishot ba khlaiñ bad ba roi jong ka India,” u la ong.
“Hapoh ka jingïalam ba ïohi jngai bad ba shitrhem jong u Myntri Rangbahduh jong ngi, u Narendra Modi, ka India ka ïaid shakhmat da ka bor, ka jingkyrmen skhem bad ka jingburom ha ka pyrthei baroh kawei. Ka jingshimkhia jong u ha ka ban tei ïa ka ri, ki jingpyrshang ha ka ban pynkylla ïa ka India sha ka ri kaba roi bad kaba lah ban shaniah ha lade ka la ai mynsiem ïa nga ban aiti ïalade ban bteng ïa ka jingshakri paidbah,” bynrap biang u Bah Mohendro.
U nongthaw aiñ barim ka Congress, uba hadien u la ïakhun ïa ka ilekshon ha u snem 2023 na ka NPP bad uba la shah rem noh ha u Bah Paul Lyngdoh jong ka UDP, u la ong ba ka jingpynleit jingmut jong u mynta kan long halor ki jingangnud jong ki nongshong shnong.
“Ka BJP ka la kren shai ba ngi dei ban sngap ïa ki jingangnud jong ki paidbah bad kata ka dei ka thong kaba ngan rah shakhmat bad aiti ban trei hok na ka bynta ka bha ka miat jong ki paidbah,” u la ong.
“Ngan trei na ka bynta ka jingkiew jong ka Jylla jong ngi, ka ri jong ngi bad nga pan ïa ka jingkyrshan bad ka jingkyrkhu jong baroh katba nga dang sdang ïa kane ka jingïaid lynti kaba thymmai. Ngan ïaleh ban pynlong ïa ka jingïaid lynti jong ngi ryngkat-ryngkat, ka khana jong ka jingkiew, ka jingroi bad ka jingsarong ïa ka Meghalaya bad ka India,” u la pynpaw.
“Ym don jingpyntikna ban ïoh tiket ha ka BJP”: State President
Haba pdiang sngewbha ïa u Bah Mohendro, u State President ka BJP, u Rikman G. Momin u la ong ba ka seng ka dang plie ïa ki nongïalam kiba kwah ban pynkhlaiñ ïa ka seng, hynrei u la ban jur ba ka jingai tiket kam long kaba tikna.
“Ngi pdiang sngewbha ïa u MLA barim, Bah Mohendro Rapsang. U la pynïasoh sha ka BJP mynta ka sngi, bad ngin ïatreilang,” ong u Momin.
U la pynsngew ruh ïa ka jingkitbok-kitrwiang na u President barim, Bah Ernest Mawrie, uba don mynta ha Kolkata.
Halor ka jingkylli ban ïoh tiket, u Momin u la ong, “Ngim ju pyntikna tiket namar ha ka BJP la pdiang sngewbha ïa baroh ban pynkhlaiñ ïa ka seng. U nongïalam uba bha bad u nongïalam uba paw khmat uba pynïasoh – kan ïarap ïa ka seng ban kiew.”
U la kyntait ruh ïa ki jingkynnoh halor ka jingïapher jingmut hapoh ka seng.
Na ka liang u Momin u la ong ruh ba ki jingpynrung dkhot kin dang bteng.
“Ha ka saiñ pyrthei, ka jingpynïasoh ka don beit man ka sngi, kumta haba don ki briew kiba kwah ban ïasoh, ngi pdiang. Ngi pdiang sngewbha ïa baroh khnang ba ki skhim, ki projek kiba ka Sorkar India ka la dep mang sha ka Jylla Meghalaya kin poi sha ki nongioh jingmyntoi,” u la ong.
Haba kylli shaphang ki MLA barim ki ban dang pynïasoh shuh-shuh, u la bynrap, “Ngan ym pat lah ban pynpaw mynta hynrei ka jingpynïasoh kan dang ïaid shakhmat.”
