Shillong, Jylliew 23
U Chief Executive Member (CEM) ka Khasi Hills Autonomous District Council (KHADC), u Bah Winston Tony Lyngdoh, u la kynthoh da kaba ong ba u Bah Titosstarwell Chyne, uba dei u nongïalam ka liang ïatei ha District Council u dei u briew uba sarong bad u kheiñ khynnah sah ïa ki.
“Ngin nym shah ban shah kheiñ khyllung khynnah sah haduh mynta bad ka jingleh jong u Bah Titos, ka paw ba um kheiñ snep ïa ka jingtrei shitom ka District Council ha kine ki shi snem tam,” la ong u Bah Winston Tony Lyngdoh haba kren sha ki lad pathai khubor ha ka sngi Ba-ar jong ka taïew.
Ïa kane u Bah Winston u la kynthoh hadien ba u Bah Titos Chyne u nongïalam ka liang ïatei, u la mih jyndat ha ka sngi kut jong ka Dorbar mang tyngka ha District Council, halor ka jingbym ai ailad u shongknor (Chairman), u Bah Strongpillar Kharjana ban wanrah ïa ka Amendment ha KHADC Service Rules 2026.
U Bah Winston u la ong ruh ba yn ïakren kumno ïa ka Amendment, haba ïa kane la phah weng noh ne ‘delete’ noh, da kaba ong ba lada u Bah Titos u sngewkhia shisha ïa ki nongtrei ka District Council, u la dei ban wanrah da ki Clause.
Kum ban shu kdew ba u Bah Titos kum u nongwanrah ïa ka Amendment u la pan ïatai halor kane ka Service Rules, 2026, hynrei u Shongknor u la ong, ba kam ïahap namar la phah ‘delete’.
Na kane, ka la mih ka jingïania kaba jur bha hapdeng u Bah Titos bad u Shongknor, kaba la pynlong ruh ïa u Bah Winston Tony Lyngdoh ban tuklar bad wanrah ka jingïather nia kaba jur ha ka sngi kut ka dorbar mang tyngka ka District Council.
Hadien kane, u shongknor u la pan ïa ka sur na ka ïing, la yn shah ne-em ban rah ïa ka Amendment bad ki dkhot na ka Executive Committee ki la ïeng ban pyrshah.
Kane ka la pynlong ïa u Bah Titos ban ong “La pynduh ïa ka hok jong u ban kren bad na ka jingbym sngap u Shongknor, ka la pynlong ïa u bad ki MDC liang ïatei ban mih noh na ka ïing”.
U Bah Winston u la ong ba hadien ba u peit ïa kaba u nongïalam ka liang pyrshah u phah ‘delete’ lut bad kum u nongïalam uba la rangbah ha KHADC u pyni, ba um suidñiew ïa ka jingtrei shitom ka Executive Committee ban wanrah ïa ka Service Rules, 2026, kaba long hadien 65 snem ban pynbeit ryntih ïa ka thungkam thungjam ha ka Council.
“Ka jingleh sarong u nongïalam ka liang pyrshah bad jin lada u wanrah ïa ka Amendment da ki Clause ban ïakren la lah ban ïatai nia, hynrei ka jingphah ‘delete’ ïa baroh kam long kaba ïahap,” u la bynrap.
Nalor kane, u Bah Winston u la ong ba lada u phah ‘delete’ lut kan nym ïahap satia bad bynrap, ba u dei uba la rangbah napdeng ki MDC bad lada u sngewkhia na ka bynta ki nongtrei ka Council u la dei ban wanrah da ki Clause hynrei ka jingleh u nongïalam ka liang pyrshah ka pyni, ba um kheiñ snep bad kheiñ khyllung khynnah ïa kiba don ha ka Executive Committee ïa kaba kum u Chief Executive Member un nym shah.
