Shillong, Jylliew 23
Ka State BJP ha ka Sngi Ba-ar ka la ong ba kan ym pat shim rai halor u kyrtong na ka bynta ka ilekshon shiteng samoi sha ka Shillong Lok Sabha tad ynda ka Election Commission of India (ECI) kan da pynbna shuwa ïa ka tarik thep ‘vote’.
Halor kane, u State-President, u Rikman G. Momin u la ban jur ba ka rai ka shong ha ki nongïalam ba halor jong ka seng.
Haba kren sha ki lad pathai khubor hadien ka jingrung seng jong u MLA barim ka West Shillong, Bah Mohendro Rapsang, la kylli ïa u Momin halor u kyrtong uba lah ban ïakhun ha kane ka ilekshon shiteng samoi ban wan.
“Ïa kane ka jingkylli la kylli (ïa nga) ha kine ki lai-saw bnai ba la dep,” ong u Momin.
La ka seng ka pyrkhat ne em ïa u Bah Rapsang na ka bynta kane ka ilekshon shiteng samoi, u la bynrap, “Kata kam don ha ka jingmut jong nga, kata ka dei ka ilekshon sha ka Ïingdorbar Parliament (kaba yn sa rai da ki nongïalam ba halor).”
U Momin u la ong ba ka seng hapoh ka Jylla ka long kaba la khreh hynrei kan ap shuwa ïa ka jingpynbna na ka ECI.
“Ki nongïalam ba halor jong ngi ki dang ap ïa ka jingpynbna jong ka ECI. Haduh mynta, ka ECI kam pat pynbna eiei. Ym don eiei ban kyrkieh. Ngi dang pynkhreh ïa la ki jong ki kam,” u la ong.
Ka shuki jong ka Shillong Lok Sabha ka la sah thylli hadien ka jingkhlad noh jong u MP, Dr. Ricky AJ Syngkon ha ka 19 tarik u Rymphang, mynta u snem.
