Shillong, Jylliew 23
Ka BJP ha ka Sngi Ba-ar ka la pynpaw biang ïa ka jingbym pdiang satia haba ïadei bad ka mat halor ka jingwan rung be-aiñ, ha kaba u State-President, u Rikman G. Momin u la ong ba ka seng kan leh da kaba tyngeh ïa kano-kano ka jingwan rung be-aiñ watla um da kwah than eh ban ong eiei halor ka jingjia ba dang shen ha Mahendraganj.
Haba kren sha ki lad pathai khubor, u Momin u la ong ba ïa ka jingjia ha ki thaiñ khappud ka South West Garo Hills la dep ban pynbeit da kaba suk bad um ïohi ba ka don kano-kano ka jingïadei bad ka Bangladesh.
“Nga ruh nga la ïohi ïa ka khubor, hynrei ngam tharai ba ka dei ka Bangladesh. Nga ngeit ba u dei u briew uba don jingduna ha ka bor pyrkhat uba ïaid ha katei ka jaka. La lah ban pynbeit da kaba suk,” la ong u Momin.
La ka jingrung ka long kaba dei ne kaba be-aiñ, u Momin u la ong ba ki jingtip ba bniah kim pat shai bha, hynrei la pyndonkam ïa katei ban pynpaw ïa ka nongrim jong ka seng halor ka jingïada ïa ki khappud.
“Ngam lah ban ong mynta la ki leh ha ka rukom katkum ka aiñ ne kaba be-aiñ. Ngam lah ban ong. Ngi pyrshah jur ïa ka jingwan rung be-aiñ. Haba don kiba wan da ka lynti jong ka aiñ, te ngim lah ban ong eiei ïa kata, hynrei be-aiñ, ngi pyrshah jur ïa kane. Ngin leh da kaba tyngeh pyrshah ïa kata,” u la pynpaw.
