Shillong, Jylliew 23
U Symbud Myntri Rangbah ka Jylla ba khmih ïa ka tnad Transport Bah Sniawbhalang Dhar u la pynbna ba palat 15 tylli ki bos thymmai yn sa pynkamai noh naduh ka 3 tarik Naitung, haba kyntu ïa ki tnad ba kin pynthikna ïa ka jingsumar bha ïa ki bos bala don lypa.
U Symbud Myntri Rangbah u la ong ba ka Sorkar ka la ju bthah man ka por ïa ki nongpynïaid bad ïa ki nongñiah bos ban maramo bad sumar bha ïa ki kali khnang ba kin ym kylla long ki bym lah pyndonkam shuh tang hadien shi snem ne ar snem.
U Bah Sniawbhalang u la ong, “Na ka por sha ka por ngi la bthah ïa ki nongpynïaid bad ki nongñiah bos ba kin maramot bad sumar bha ïa ki bos, kam dei ban long ba tang hadien shisnem ne ar snem, kine ki bos kin sniew noh bad ym long shuh ban ïaid.”
U la ong ba u la lum ïa ka jingïalang ha u bnai ba la dep ban bishar bniah ïa ka jinglong jingman jong ki bos khnang ba ki nongleit nongwan kin sngewtynnad ban pyndonkam ïa ki. “Ha u bnai ba la dep nga la khot ïa ka jingïalang ban pynthikna ba kine ki bos kin long kiba bha bad kiba itynnad khnang ba ki briew kin ïoh mynsiem ban pyndonkam ïa ki,” u la pynpaw.
Ïa kine ki bos thymmai yn pyllait paidbah na ISBT bad kin ïaid ha ki lynti kiba bun ha kylleng ka nongbah Shillong.
“Ha ka 3 tarik Naitung ngan pyllait paidbah ïa ki bos thymmai na ISBT ba kine kin ïaid ha ki jaka thymmai jong ka nongbah. Ki don palat 15 tylli ki bos thymmai,” u la ong.
U la kdew ba katto katne ki tnad, kynthup ïa ka Planning, Municipal, bad ka MUDA, ki pyndonkam mynta ïa ki bos Sorkar, bad u la kyrpad ïa ki ban shim ïa ka jingkitkhlieh na ka bynta ban sumar bha bad maramot lada donkam.
