Shillong, Jylliew 24
Ha kawei ka jingjia shah tuh ksiar ka la jia ha ka por mynsngi mynshai, kawei ka briew ka la leh mynleh pan um na kawei ka ïing, kaba don tang lai ngut ki khynnah rit bad ka la tuh noh ïa ka jingdeng ksiar jong iwei khyllung rit iba dang lai snem ka rta.
Kane ka jingjia ka dei kaba la jia ha ka por 1 baje mynsngi jong ka 23 tarik u Jylliew 2026 ha ka shnong Mih-myntdu Dong Lum-chyrmang, West Jaiñtia Hills District.
U Nongsaiñ Hima u la ïoh ban ïakren lyngba ka phone ïa ka kmie jong itei i khyllung ba shah tuh ksiar ka Kong Tudiah Chyrmang, ka la ïathuh ba ha katei ka por ki khun jong ka ki don tang lai ngut para khynnah ha ïing, ka la wan kawei ka briew kaba ki khun jong ka ki khlem ithuh satia ïa ka, hynrei katei ka briew ka la pan umdih na u khun baheh jong ka. Katba utei u hynmen u dang leit shim um, katei ka briew ba la shah kynnoh nongtuh ka la ai pisa 20 tyngka ïa i heprit ba dang lai snem ka rta bad ka la tuh ïa ka jingdeng shkor.
Ka la ïathuh ba katei ka jingdeng ksiar ka dei kaba dang shu dep thied kaba don lai ana, ha ka dor T. 40,000, katba katei ka briew ka la ïoh ban tuh tang shiliang ka shkor kaba long shi ana shiteng kaba shongdor T. 20,000.
“Ba kloi ai um u khun, ka nongtuh ka la ïoh ban tuh tang shiliang bad ka khun ka ïathuh ba katei ka briew ka Ot da ka tari ïa ka ksiar na ka shkor jong ka” ïathuh ka Kong Tudiah.
Shuh-shuh ka la ïathuh ba ka khun jongka ka khlem don kano-kano ka jingmong jingmynsaw, hynrei ha ka step kaba bud ka i kumba don jingshitom eiei bad ka la leit ban ïalam sha ki doktor ban peit bniah ïa ka jingkoit jingkhiah jong i khyllung.
Ka Kong Tudiah ka la kyrpad ïa ki paidbah, ba lada lap ba tyrwa die ïa katei ka ksiar ha kano-kano ka por la ha ki dukan ne hangno-hangno ruh ba kin sngewbha ban bat ïa ka bad ba kin pyntip sha ka lyngba u nombar phun 60096 61403 bad bynrap ba kan sa ai bai burom ne buskit ïa kiba pyntip.
