Shillong, Jylliew 24
U Chief Executive Mem-ber (CEM) ka Khasi Hills Autonomous Dis-trict Council (KHADC) haduh mynta um pat phah ïa ka kyrteng jong u MDC ban rung bujli kum u Executive Member ha jaka u Bah Pynkhraw-boklin Kharjahrin hadien ba u la hiar shuki noh.
Kumban shu pynkynmaw u Bah Pynkhraw-boklin uba dei u MDC ka Mawkyrwat Konsti-twensi u la phah shithi ban hiar shuki kum u Executive Member sha ka tnad District Council Affairs (DCA) ka Sorkar Jylla bad u Lat ka Jylla ruh u la pdiang ïa kane ka shithi ha ka 19 tarik mynta u bnai Jylliew, 2026.
Haba la ïaid san sngi haduh mynta ka 24 tarik Jylliew 2026, u Chief Executive Member ka KHADC um pat phah ïa ka kyrteng jong u MDC ban mih bujli ban thung Executive Member uba thymmai.
Ki khubor ki la ïathuh ba u CEM u dang ap ïa ka rai na ka VPP ba kan jied ïa u MDC ban leit shimti ïa ka shuki EM.
Shuh shuh ki khubor ki ïathuh ba ha kine ki sngi u CEM un sa phah noh ïa ka kyrteng u MDC ba thymmai ban ïoh jingmynjur na u Lat ka Jylla khnang ban pynïaid ïa ki kam hadien ba la hiar shuki u Bah Pynkhrawboklin.
Haba u Nongsaiñ Hima u la pyrshang ban kylli ïa u Bah Pynkhraw na kaei ka daw ba u hiar shuki, ym shym la ïoh bad haba pyrshang ban ïakren bad u CEM Bah Winston Tony Lyngdoh um pat treh kren haduh mynta.
Ki khubor kiba ïajan ki ïathuh ba ka jinghiar shuki u Bah Pynkhraw ka lah ban don ka jingïapher jingmut bad ki para MDC ne bad ki nongïalam ka VPP hynrei kane kan sa paw pyrthei tad ynda kine baroh arliang kin sa ai jingai jingkren ban shai ki paidbah.
Ka VPP ka don 18 ngut ki MDC kata 17 ngut kiba la shah jied ha ki paidbah ha ka ilekshon ha u snem 2025 bad uwei ba la shu sieh da u Lat ka Jylla.
Ïa ki tnad ba la bat da u Bah Pynkhrawboklin Kharjahrin hadien ba u la hiar shuki, la peit shipor da u CEM khnang ban pynïaid beit ïa ki kam.
