Shillong, Jylliew 24
Ka Shillong Commerce College ka la ïaid hynriewphew tylli ki snem ban ai jingshakri ha ka ban ai jingnang jingstad bad ban tei ïa ka lawei jong kiba bun ki samla pule, ka 24 tarik Jylliew 2026 ka la long kawei na ki sngi ban sah jingkynmaw ha ka histori jong ka, ïa kaba ka la ïoh ban rakhe ïa ka Diamond Jubilee jong ka halor ka phangpdeng “Ka jinghi-kai ïa ki pateng, ka jingpynkupbor ïa ka lawei”.
La ong ba ïa ka Shillong Commerce la seng ha u Jylliew jong u snem 1967, katba la lah ban plie ïa ka Shillong Commerce College ha ka snem 1986 bad ka la pynïasoh sha ka Skulbah North Eastern Hill University (NEHU) kumjuh ka la ïoh jingithuh University Grants Commission (UGC) bad ka jingthmu jong ka, ka long ban ai ka jinghikai kaba bha, kaba pura na ka bynta ki samla jong ka Jylla bad ka thaiñ.
Ha kane ka sngi ka Dr. Mazel Ampareen Lyngdoh kaba long ka MLA ka East Shillong Constituency ka la long ka kongsan bad kyntiew ïa ka lama Jubilee ka College ha ka jingdonlang ka Dr. (Ms.) S. Khongwir Principal jong ka College, ka Kong Aiona Kharmawphlang kaba dei ka Vice Principal, ki nongkitkam ka Governing Body jong ka College bad kiwei-kiwei.
Haba ai jingkren ka Dr. Ampareen ka la kren halor ka jingdonkam ban ïoh ïa ka jingpule kaba pynshong nongrim ha ka jingtbit bad ka la ïaroh ïa ka jingaiti lut jong ki khynnah skul bad ki nonghikai ha kaba kyntiew ïa ka ri kum ka ri kaba kiew bad kaba la jam shakhmat.
Ka la kren lyngkot ruh ïa ka jingpdiang ïa ka NEP 2020 bad ka la ban jur ïa ka jingdonkam ban pdiang ïa ka, na ka bynta ka jingbha jingmiat jong ki samla pule ka Jylla bad ki jingeh kiba don haba la pdiang ïa ka.
La pynpule ïa ka khana lyngkot jong ka College da u B. R. Upadhya uba long u Vice Principal & Head jong ka Commerce Department, kynthup ruh ïa ki jingpyni ïa ki kolshor bad ki jingrwai na ki samla pule jong ka College.
