Shillong, Jylliew 24
U General Secretary ka United Democratic Party (UDP), u Bah Titosstarwell Chyne, ha ka Sngi Balang, u la pynpaw ïa ka jingkyrmen skhem hashuwa jong ka ilekshon shiteng samoi sha ka Shillong Lok Sabha, da kaba kdew ba ka seng kam pat ju shah rem ha ki ilekshon shiteng samoi.
U Bah Titos u la ong ba ka seng ka la sdang ïa ka jingpynkhreh watla kam pat shym la don kano-kano ka jingpynbna kaba tikna na ka Election Commission.
“Ngim pat tip lano ka ilekshon kan long, hynrei kum ka seng, ngi la sdang ïa ka jingpynkhreh naduh mynta. Ngin ïaid katkum ki distrik. Ngin sa leit ruh sha kiwei pat ki distrik ban pynlong ïa ki jingïalang jong ka seng; nyngkong ha ka kyrdan jong ka distrik, nangta ngin sa leit sha ki konstitwensi namarba ki don ruh ki konstitwensi ïa mynta. Ki kam kin ïaid shakhmat. Shisien ba la pynbna ïa ka tarik ilekshon, hangta ngin sa leit sha u paidbah,” u la ong.
Haba kyntait ba ka jingïalap ilekshon kaba pura ka la sdang, u la ong ba ka seng ka la sdang ban pynithuh ïa u kyrtong jong ka sha ki nongthep ‘vote’.
“Ngam lah ban ong ba ka dei ka jingïalap, hynrei ka jingpynithuh ïa u kyrtong ka la sdang,” la ong u Bah Titos.
U la bynrap ba kane ka kam ka la nang ïaid shakhmat lyngba ki konstitwensi ha kaba ki MLA bad MDC ki dei na ka UDP: “Hooid, ngi ïaid shakhmat.”
Haba kylli shaphang ka jingkyrmen jong ka seng ha u kyrtong jong ka, u Bah Titos u la kdew shai ïa ka histori jong ka UDP haba ïadei bad ki ilekshon.
“Ngi sngew skhem beit. Kynmaw kawei ba ka UDP kam pat ju shah rem ha ki ilekshon shiteng samoi. Ngi la jop kawei hadien kawei pat ka ilekshon shiteng samoi. Bad hooid, nga kyrmen ba kane kan jia biang ha kane ka ilekshon shiteng samoi,” u la ong.
Haba batai ïa ki mat jong ka seng na ka bynta kane ka ilekshon sha ka Ïingdorbar Parliament, u Bah Titos u la ong ba ka UDP kan pynleit jingmut ha ki mat kiba hap hapoh ka jingpeit jong ka Sorkar Pdeng.
“Haba ngi leit sha ka ilekshon MP, ka mut ngi hap ban ïakren ïa ki mat kiba ïadei bad ka Sorkar Pdeng. Ki don bun bah ki mat kiba dang sahteng, kum ka ILP, ka jingpynrung ïa ka ktien Khasi ha ka Khyrnit ba 8, ka jingdonkam ban pynkylla ïa ka hukum jong u snem 1950 kaba ïadei bad ka thup ki ‘Scheduled Tribe’, ïa kaba ngi donkam ban khmih bniah biang,” u la ong.
U la pynsngew ruh halor ka Meghalaya Minerals and Mines Development Regulation Act, lane ka MMDR Act, kum ka mat ba kongsan.
“Ngin kren ruh shaphang ka aiñ MMDR, kumba phi lah ban ïohi ba ki paidbah ka Jylla ki ïakhih jur namarba ki kwah ban tih dewïong khlem da pynsniew ïa ka mariang, naba kane ka ktah ïa ka jingim bad ka kamai-kajih jong ki paidbah,” la ong u Bah Titos.
Ki mat khappud bad ki jingeh ha ka liang ka ïoh ka kot ha ki jaka khappud ruh ki la don ha ka ‘agenda’.
“Ngin ïakren ruh kumno ban pynbeit ïa u pud u sam hapdeng ki Jylla bad u pud u sam bar-ri, kumjuh ban pynkhlaiñ ïa ki ïew ki hat ha ki thaiñ khappud,” u la bynrap.
