Shillong, Jylliew 24
U Nongïalam ka Liang Pyrshah ha ïingdorbar ka Khasi Hills Autonomous District Council (KHADC) Bah Titos Chyne u la ong ba ka ju jia ha ïingdorbar thawain ka Jylla ne ha KHADC haba ki dkhot ka liang pyrshah ki ïa tied miej ne ki mih jyndat ha ïingdorbar hynrei ynda la wai ki ïa dih sha lang.
Kane ka jingpynpaw u Bah Titos ka dei ban pynshai halor ka jingkren jong u Bah Winston Tony Lyngdoh, CEM ka KHADC uba la kynnoh ïa u, ba u dei uba sarong namar u phah weng lut baroh ki kyndon ha ka Service rule ïa kaba ka EC ka la wanrah ha ka dorbar ba dang shu dep.
U Bah Titos u la ong ba ka jingkren u Bah Winston ïa u ka long kumba kynnoh beit shimet namar ha ka ri synshar paidbah ka ju don ka jingïakhluit hynrei ym pat ju bna ba u Myntri Rangbah ka Jylla un kynnoh ba u dei uba sarong lada ki MLA ki mih jyndat na ïingdorbar.
U la ong ba ki dkhot ka liang pyrshah ki buh ka jingkylli khnang ban ïatai haba ka Executive Committee kan pynshai ïa ka nongrim ba ka wanrah ïa ki bill ha dorbar.
Shuh shuh u la ong ba ym dei ba ki MDC ha KHADC kiba shong ha liang pyrshah ki mih jyndat lada kim sngewhun ïa ka jubab jong ka EC hynrei wat ki MLA ka VPP ruh ki ju mih jyndat ha ïingdorbar ruh.
