Shillong, Jylliew 24
Ki runar bym lah ban tip ki dei kiei, ki la kawang da u petrol bom ïa ki ar tylli ki trok kiba la pynïeng ha kawei na ki jaka kiba dang hap hapoh ka thanad Dawki ha West Jaiñtia Hills.
Katkum ka khubor kaba la ïoh na ki pulit la ong ba ki pulit ki la ïoh pdiang ïa ka jingtip ba ha ka 20 tarik mynta u bnai, ha ka por kumba 2.15 eiei dang step, ki runar bym lah ban tip ki dei kiei, ki la kawang petrol bom ïa ki ar tylli ki trok, kata kiba don ïa u registration number TR05-H-1822 bad TR05-E-1700.
Shuh shuh la ong ba hadien kane ka jingshah kawang petrol bom, na ka liang ki briew jong ki trok ryngkat bad ki nongshong shnong ka thaiñ ki la mih mar mar ban pynlip noh ïa ka ding bad la ong ruh ba ha kane ka jingjia, ym shym la don satia mano-mano ba mynsaw.
