Shillong, Jylliew 24
U General Secretary ka United Democratic Party (UDP), u Bah Titosstarwell Chyne ha ka Sngi Balang u la ong ba ka Regional Democratic Alliance (RDA) ka ïaineh bad ka skhem bad na ka liang ka UDP ka dang ap ïa ka rai ba khatduh na ka Hill State People’s Democratic Party (HSPDP) haba ïadei bad ka jingkyrshan ïa u kyrtong ka UDP, u Bah V.G.K. Kynta ha kane ka ilekshon shiteng samoi sha ka Shillong Lok Sabha.
U Bah Titos u la pyntikna ba ki la don ki jingïakren hapdeng kine ki 2 tylli ki seng kiba ïatehlok hapoh ka lama jong ka RDA.
“Ka la don ka jingïakynduh hapdeng ka HSPDP bad ka UDP hapoh ka Regional Democratic Alliance, hynrei kim pat shym la ai ktien haduh mynta,” u la ong.
Haba kylli, u Bah Titos u la ong, “Ngam lah ban kren eiei halor kata. Ym lah ban ong kumta namarba ma ki lehse kim pat rai. Hynrei na ka liang jong ngi, ngi dang pynneh ba ka RDA ka dei ban neh beit. Ka RDA ka dang ïaid shakhmat. Ym pat don kano-kano ka jingïalang ban ong ba ngi dei ïaid noh la ka jong ka lynti. Ym don kaba kum kata,” u la pynpaw.
Halor ka jingmih na ka jingïalang kaba dang shen, u Bah Titos u la ong ba ïa kane ka kam yn ap shuwa ïa mynta.
“Ka jingmih na ka jingïalang kaba dang shen ka long ba ïa kane yn ap shuwa ïa mynta namarba kim pat lah ban ai kano-kano ka rai haduh mynta,” u la ong.
U la bynrap ba ka UDP ka dang ap ïa ka jingpynshai na ka seng ba ïatehlok bad ka halor kane.
“Ngi dang ap ïa ki (HSPDP) ban ai ïa ka rai jong ki,” la ong u Bah Titos.
