Shillong, Jylliew 24
U Symbud Myntri Rangbah ka Jylla ka tnad Transport, u Bah Sniawbhalang Dhar u la ong ba ka Sorkar ka don hapdeng ka jingpynkhreh ban ïaid shakhmat bad ka ‘Vehicle Scrappage Policy 2025’, bad ka thmu ban pyntreikam ïa ka hashuwa ban kut u snem.
U Bah Dhar u la ong ba ïa ki jingtip ba bniah jong kane ka polisi, kynthup ïa ka jingdon ki kali ban shah pynduh mynta u snem, yn sa pynbna shisien ba la don ïa ka saiñdur treikam.
“Ngi dang don ha ka jingpynkhreh ban trei halor kane, bad kan shim por katto-katne. Ynda la pyndep lut ïa kiei-kiei baroh, yn sa pyntip lut sha phi – katno tylli ki kali, bad kino ki kali ki ban shah pynduh mynta u snem. Kumta, mynta u snem ngi dang don ha ka jingpynkhreh ban pyndep ïa ka,” la ong u Bah Dhar.
Shuh shuh u la kubur ba ban pynbit-pynbiang ïa kane ka rukom treikam kan kham shim por, hynrei u la pynpaw ïa ka jingkyrmen skhem ban pyntreikam ïa ka ha u snem 2026.
“Kan shim por khyndiat, bad katkum ka jingsngew jong nga, hapoh une u snem ngi dei ban lah ban pyntreikam ïa ka,” u la pynpaw.
