Shillong, Jylliew
Ki nongtrei Muster Roll kiba don ha ka shatri jong ka All Meghalaya Muster Roll Progressive Workers Union (AMMRPWU) hadien katto katne sngi ba ki pynpaw ba ki khlem ïoh tulop ar haduh lai bnai, ha ka Sngi Palei ki la pynpaw ka jingai khublei ïa ka Sorkar Jylla ba ka la pyllait ïa ka tulop jong ki.
Haba kren sha ki nongthoh khubor u Bah Nazarius K Lanong General Secretary AMMRPWU uba long ruh u Chairman ka JAC u la ïathuh ba hadien ka jingud jingnam ki nongtrei Muster Roll halor ka jingbym ïoh tulop jong ki ha kine ki bnai ba la dep, ka Sorkar ka la sngew la sngap ïa ki jingkyrpad jong ki, ha kaba ha kine ki sngi ki la don kiba la ïoh tulop bad ai khublei kyrpang ruh ïa u Myntri Rangbah ka Jylla u Conrad K Sangma.
U Bah Nazarius u la pyntip ruh sha baroh ki nongtrei Muster Roll kiba don ha kylleng ki District haba ïadei ka General Meeting kaba ki la rai ban pynlong ha ka 27 tarik Jylliew ha Polytechnic, Mawlai Kyntonmassar la hap pynsangeh noh shwa namar ki don ki kam ba dang hap ban pynbeit bad ïa ka tarik ban sa pynlong yn sa pyntip hadien.
