Shillong, Jylliew 25
Ka Meghalaya Pradesh Congress Committee (MPCC) ka la ther tyngeh ïa ka Sorkar Pdeng ïa kaba la ïalam da ka National Democratic Alliance (NDA) halor ka jinghiar ka pule-puthi ha ka ri baroh kawei.
Haba kren sha ki nongthoh khubor u Chairman jong ka MPCC Social Media Cell, u Bah Langkupar War u la pynrem jur ïa ka National Testing Agency (NTA) bad u la kynnoh ba ka jinglait tuh ki jingkylli ha ka eksam NEET-UG 2026 ka la ktah jur ïa ki 2.2 million tam ki khynnah samla kiba thmu ban pule doktor bad kdew ba kane ka pynpaw shai ruh ïa ka jingthurmur ka rukom pynïaid eksam ha ka ri India.
Watla ïa kane ka exam la pynlong biang ha ka 21 tarik u Jylliew 2026, ha ki 5,440 tylli ki jaka ïaleh eksam, ka party Liang Pyrshah ka kdew ba kane ka dei tang ka jingbteng jong ki jingkulmar kiba la wan naduh u snem 2024, ha kaba ka Ïingkashari Supreme Court ka la pynshisha ïa ka jinglait tuh ki jingkylli ha Patna bad Hazaribagh, kaba la pynlong ruh ban hap pynsangeh pynlong ïa ka UGC-NEET 2024 bad ka jingpynkynriah biang ïa ka por ïa ka CUET-UG 2026.
Ka MPCC ka la kdew ruh ba ki aiñ kiba la thaw kum ka Public Examinations Act 2024 kim shym la lah ban khanglad ïa kine ki kam be-aiñ namar kam don ka jingshimkhia kaba la pynlong ïa ka Central Bureau of Investigation (CBI) ban tohkit bad ïoh kem ïa kiba bun ki riewstad kiba ka NTA hi ka la thung ban thoh ïa kine ki jingkylli.
Ka MPCC ka la kynnoh ba ka jingkhanglad ïa ka pisa Samagra Shiksha na ki Jylla kum ka Kerala, Tamil Nadu, bad West Bengal namar ka jingïasoi halor ka PM-SHRI Memorandum of Understanding (MoU). Ka party ka pynpaw ba ka ri ka pynlut tang 4.12 % na ka GDP ha ka pule-puthi ha u snem 2021-22, kaba duna bha na ka 6% kaba la buh da ka National Education Policy (NEP).
Shuh-shuh la ong, ha ka mang tyngka 2024-25, la khate biang ïa ka pisa jong ka Union Education Ministry haduh 7% bad la pynduna ïa ka pisa jong ka University Grants Commission (UGC) haduh 61%, kaba la pynbor ïa ki longïing ban siew ïa ka dor kaba rem ha ki jaka ai ‘Coaching’ shimet.
Ka Congress ka la kdew ruh halor ka jingkylla ha ka rukom pyrkhat bad ka jingsangeh ban pynbiang Scholarship ïa ki kynhun rit-paid kaba kynthup ban pyrkhing ïa ki khynnah Khristan naduh u snem 2022-23, ka jingpyndam ïa ka Maulana Azad National Fellowship bad ka jingweng ïa ki lynnong shaphang ki Mughal bad ka Periodic Table na ki kot NCERT.
Ka MPCC ka kdew ba ka don ka jingpyntroiñ kaba khraw ïa ka pule puthi namar kumba shi million ki kam hikai ki dang sah thylli ha ka ri baroh kawei bad kane ka la paw shai ha ka report Annual Status of Education Report (ASER) 2024 kaba pynpaw ba tang 23.4% ki khynnah klas 3 kiba lah ban pule ïa ka kot pule jong ka klas 2, haba kumba 104,125 tylli ki skul ha ka ri ki dei kiba la pynïaid da uwei u nonghikai.
Ïa ki samla pule jong ka Jylla Meghalaya, kane ka jingshim sting ka rukom pynïaid kam jong ka Sorkar pdeng ka la wanrah ïa ka jingkhia bad ka jinglut kaba bun namar kumba 4,164 ngut ki samla na ka Jylla ki la hap ban thoh biang ïa ka eksam NEET ha ki 14 tylli ki jaka ïaleh eksam kiba la pynbiang hapoh ka Jylla.
Ka thong jong ka Sorkar Pdeng ban pynkylla ïa ka NEET sha ka rukom Computer ne Online ha u snem 2027 kan khanglad ïa ki khynnah samla nongkyndong bad kiba dei na ki jaitbyniew riewlum ha Meghalaya namar ka jingbymbiang ki kor ki bor Digital. Ki jingkheiñ na ki bor Sorkar ki pynpaw ba tang 19.7% ki skul ha Meghalaya kiba don Computer haba hakhmat ka ri ka jingshisha ka long 64.7%.
Lyngba kine ki jingkheiñ kiba la shim na ki rynsan Sorkar kum ka Digital Sansad, UDISE Plus, bad AISHE, ka Congress ka la dawa ba u Myntri ka tnad pule puthi jong ka ri u dei ban hiar shuki noh mardor.
Shuh shuh, ka party ka dawa ïa ka jingtohkit kaba laitluid halor ka jingshakri jong ka NTA naduh u snem 2024 haduh 2026, ka jingpynmih ïa ka ‘White Paper’ kaba ïathuh shai ïa baroh ki jinglait ki jingkylli naduh u snem 2018 bad ka jingpynshai paidbah halor ki jingai jingmut jong ka Radhakrishnan Committee.
Ka party ka la dawa ruh ïa ka jingthung kam mardor ïa ki 846,000 ngut ki nonghikai ha ka ri baroh kawei bad ban pynkiew ïa ka mang tyngka ha ka pule-puthi da 6% na ka GDP. Ka MPCC ka la kylli ïa ka Sorkar Pdeng ba balei ki jingkylli ki dang bteng ban lait tuh wat ha u snem 2026 bad ka la pynrem jur halor ka jingshim sting bad ka jingbym don kano-kano ka jingïarap pisa kyrpang ïa ki khynnah samla na ka thaiñ Shatei Lam-Mihngi kiba la pynlut na ka pla lajong ban thoh biang ïa kane ka eksam kaba rem dor.
