Shillong, Jylliew 25
Uwei u briew ba dang 22 snem ka rta na Uttar Pradesh u la shah kem noh ha Surat, Gujarat halor ka jingkynnoh donkti ban ‘cyber blackmail’ kaba la pynlong ïa kawei ka samla na Mawkyrwat, South West Khasi Hills District ban dkhat jubor ïa la ka jingim ha u bnai Ïaïong.
Kane ka jingshah kem ka la long hadien ka jingai jingujor da ka samla Balapynhun Nongrum kaba na ka shnong Mawkyrwat, kaba la pyntip sha ki pulit ba ka para jong ka ka la dkhat ïa la ka jingim da kaba sdien phasi ha ka 19 tarik Ïaïong, 2026, ha ka por kumba 6:40 janmiet hadien ba ka ïoh pdiang ïa ki jingbyrngem byrsit ba laiphew jait.
Ïa une u briew la kem noh da ki pulit ka South West Khasi Hills bad u dei uba la tip kyrteng kum u Sachin Nishad, khun jong u Yogendra Nishad bad u nongshong shnong ka Bhidoor, Ambedkar Nagar ha Uttar Pradesh.
Katkum ka ejahar, la kynnoh ba une u briew u la ïoh ïa ka dur bad ki durkhih jong kane ka ‘thei samla bad byrngem ban pynsaphriang ïa ki hapoh Whatsapp bad Instagram lada kam ai ïa kaei kaba u dawa.
Halor ka jingujor, ki pulit ka Mawkyrwat Women Police Station kila register ïa ka case hapoh ki kyndon ka Bharatiya Nyaya Sanhita bad ka IT Act, bad sdang pynlong ïa ka jingtohkit.
Haba buddien ïa ki sakhi satar digital, kala ïalam ïa ka kynhun tohkit sha Surat District, ha kaba ka kynhun ki pulit na South West Khasi Hills da ka jingïarap ki pulit ka thanad Palasiya ha Gujarat, kila ïoh kem ïa une u briew ha ka 23 tarik mynta u bnai ha ka por kumba 2:30 baje janmiet.
Ïa une u briew la ïalam tian bishar hakhmat ka ïingbishar Judicial Magistrate First Class bad ka ïingbishar kala ai ïa ka bor ïa ki pulit ba kin wan ïalam ïa u sha Mawkyrwat.
Ha ka kyrwoh ba la pyllait ha ka sngi Palei, u Superintendent of Police ka SWKH u la kyntu ïa ki paidbah khamtam ïa ki samla bad ki lanot jong ki kam shah pyndik lyngba ki kor online, ba kim dei ban shu sngap lane leh ïa ki kam kiba long palat liam.
Ki pulit kila ban jur ba ki cyber blackmail, sextortion bad ki jingbyrngem ban pynsaphriang ïa ki dur ne ki durkhih shimet ki dei ki kam bymman ba shyrkhei bha bad ba ka aiñ kan leh da kaba tyngeh pyrshah ïa kiba donkti.
Ki pulit ka District kila kyrpad ïa kino-kino kiba mad ïa kum kine ki jingshah pyndik ba kin wad ïa ki jingïarap ba mardor lyngba ki helpline, kynthup ka Emergency Police number 112, Cyber Crime Helpline 1930, Women Helpline 181 bad kiwei kiwei.
Ka jingtohkit ïa kane ka case ka dang ïaid shakhmat.
