Nongpoh, Jylliew
U MLA ka Nongpoh Bah Mayralborn Syiem, ha ka sngi Balang u la hiar sha Umling Lambrang ban plie paidbah ïa ka shlem treikam kaba thymmai jong ki longkmie ka shnong kaba la tei ha ka jinglut kaba T.2 lak ïa ka mala ba hajrong bad T.1.50 lak ïa ka mala ba hapoh lyngba ka skhim SRWP jong u snem 2024-25.
Katei ka shlem treikam kaba la tei ha ki ar mala, ka dei kyrpang na ka bynta ka jingmyntoi bad pyndonkam jong ki longkmie ka shnong, ki longkmie jong ka Balang bad kiwei de ki kam kiba saiñdur ïa ka bha ka miat bad ka roi ka par jong ka shnong.
Ha kane ka sngi la wan ban ïadon ryngkat da u Bah Balajied Rani, MDC barim ka Nongpoh, Bah Nekson Nongrum Rangbah Shnong, Kong Ïosti Maring President Seng Kynthei, Kong Ritalin Maring President Seng Kynthei Balang Presbyterian nalor kiwei-kiwei ki longkmie nongïalam bad ruh ki tymmen basan na ka Balang Presbyterian.
Ha kane ka sngi, u MLA u la ïoh ruh ban aiti ïa ka Work Order sha ka shnong na ka bynta ban tei ïa ka kynroh bad ka jingker ïa ka ïingmane jong ka Balang Presbyterian Umling Lambrang.
Haba ai jingkren ha kane ka sngi, u Bah Mayralborn u la pynpaw ïa ka jingkmen ba la lah ban pyndep ban tei ïa ka shlem treikam thymmai kaban ai jingmyntoi na ka bynta ki longkmie jong ka shnong bad ka Balang ruh kumjuh ba kin ïoh nangne shakhmat ban pynïaid beit ïaid ryntih ïa ki kam bapher-bapher.
U la kyntu ban ïai long barabor kiba sngewrit bad kiba trei shitom kampher la dei kano-kano ka kam ruh khlem ka jinglehrain. U la ai nuksa ïa ki briew ka ri China, kiba u la ïoh ban kynduh bad ïakren da kaba ong ba ki dei ki briew kiba trei minot trei shitom bad kim don satia ïa ka jinglehrain bad “kane ka mynsiem ka jong ki ka dei kaba ma ngi ruh ngi hap ban bud nuksa ban kiew shaphrang ha ka jingim.”
