Shillong, Jylliew 25
Ka Directorate of Enforcement (ED) Shillong Sub-Zonal Office ka la kurup shipor ïa ka ïing kaba shongdor T.40 lak katkum ka aiñ ban ïada na ka jingpyndonkam ïa ka pisa (PMLA) ha kaba ïadei bad ka jingkynnoh pyndonkam bakla ïa ka pisa pynroi jong ka Garo Hills Autonomous District Council.
Katkum ka kyrwoh khubor ba la pyllait ha ka 25 tarik Jylliew 2026, kane ka ïing ka dei ha ka kyrteng jong u Ismail R Marak uba dei u dkhot barim ka District Council (MDC) na ka Asanang konstitwensi.
Ka ED ka la sdang ïa ka jingtohkit jong ka da kaba pynshong nongrim ha ka charge-sheet (Special P.C. Act Case No. 01/2023 dated 18 Jymmang 2023) kaba la mudui hakhmat ka Kashari jong u Nongbishar ba kyrpang katkum ka aiñ ïada ïa ka bamsap, 1988, ha Tura, kaba mih na Meghalaya Lokayukta Complaint Case No. 01/2019.
Kane ka mukotduma ka dei kaba ïadei bad ki kam thok katkum ki kyndon 7A, 12, bad 13 jong ka aiñ ïada ïa ka bamsap. Katkum ka jingtohkit jong ka ED, na ka “Grant for Excluded Areas” kaba kot kumba 28.66 klur tyngka kaba la ïoh da ka GHADC, 1 klur tyngka la mang sha ka Asanang konstitwensi na ka bynta 49 tylli ki kam pynroi.
Da kaba pynkheiñ ïa ka Meghalaya Financial Rules, 1981, la pyllait lypa ïa ka pisa kaba 60 percent na ka dor jong ka projek sha ki arngut ki kontraktor u Kubon Sangma bad u Nikseng Sangma, pyrshah ïa ki jingbthah treikam ba la kynnoh ba la ïoh da kaba pyndonkam ïa ki jingsoi thok, watla ïa ki projek ym shym la pyntreikam. Kane ka pisa kaba la pyllait la pyndonkam bakla.
Ka jingtohkit jong ka ED ka la lap ïa ka jingmih na ki kam thok kaba la kot sha ka T.52.60 lak, ha kaba T.19.60 lak la kynnoh ba la phah ïa ka pisa sha u Marak, katba T.33 lak la phah sha ka tnga jong u, ka Pratibha Marak lyngba ki account jong ki kontraktor. Ka jingdon jingem ba la pyndait ka pyni ïa ka “dor jong ka” jong ki jingmih ba la ithuh na ka kam thok, ym palat ïa ka jingkheiñ ba la wad bniah.
Shwa ïa kane, la khang ïa ki pisa ba sah ha ki bank baroh T.16.38 lak katkum ki kyndon jong ka PMLA, ïa kane ka jingleh la pynthikna hadien da ka bor bishar.
Ïa ka jingtalasi ha katei ka mukotduma la pynlong ha ka 4 tarik u Nohprah, 2025 bad ka jingtohkit kaba kham bniah ka dang ïaid shakhmat.
