Jowai, Jylliew 25
Ka Bri U Hynñiewtrep ka la ïakynduh ïa u Ma Thombor Shiwat, CEM JHADC ban kyrpad na ka bynta ban thaw aiñ ha kaba ïadei ban pynneh pynsah ïa ka riti kheiñkur kheiñkha na ka kmie ha ka thaiñ Jaiñtia Hills khnang ba kan long ryntih shityllup ka Bri Hynñiewtrep na ka bynta ki trai-ri trai-muluk.
Ka kynhun ki rangbahkur ka kynthup ïa u Bah RL Kharpran, Khlieh Rangbah, Bah Raphael Warjri, Saiñpyniar Lumlang, Bah RL Blah, Sangot, Bah Manstudy Nongrem, bad Bah JL Khongshei bad ki dkhot rangbah ka Synjuk Ki Rangbahkur.
Ha ka jingïalang bad u Ma Thombor Shiwat ryngkat bad kiwei pat ki MDC, la pynsngew ïa ka jingdonkam kyrkieh na ka bynta ban thaw aiñ ban ïada ïa ka riti kheiñkur kheiñkha na ka kmie kaba dei ka thymmei jong ka riti dustur ba synrop lang ha baroh kiwei kiwei ki riti tynrai naduh ka khyndew haduh ka longsan mansan, ka poikha poiman bad byllai kiwei kiwei ki bynta jong ka riti tynrai.
Nalor kata, la kyntu ruh ba yn thaw ka atiar aiñ ka ban ai ka jingithuh ïa ki Dorbar Kur baroh ha ka thaiñ Khasi Jaiñtia na ka bynta ban aibor ruh ïa ki rangbah-kur ne waheh-kur ha kaba korbar ïa baroh ki kam kur ha baroh kawei ka thaiñ Khasi Jaiñtia.
Ka kynhun ka pynpaw ka jingshaniah skhem ha ka iktiar jong ka Dorbar Thawaiñ Dalariti Rilum Jaiñtia ba la ïalam da u Ma Thombor Shiwat ba yn lah ban pynurlong kham kloi.
Na ka liang jong u Ma Thombor Shiwat ruh u la pynpaw ka jingsngewnguh ïa ka Synjuk Ki Rangbahkur ba ki la kyrsiew bad noh synñiang da ka ba ai lem ki dulir na ka bynta ban lah ban thaw aiñ ha ka ban pynneh pynsah ïa ki riti dustur tynrai, khamtam ïa ka riti kheiñkur kheiñkha na ka kmie.
Na ka liang ka Synjuk ki Rangbahkur ki la kular ban aikti lem ha kano-kano ka liang na ka bynta ban urlong ka kam thawaiñ ban ïada ïa ka riti kheiñkur kheiñkha na ka kmie, ryngkat kaba ïa syllok lang bad ka Dorbar Thawaiñ Dalariti Rilum Jaiñtia.
