Shillong, Jylliew
Ki samla pule jong ka BK Bajoria School, Shillong ha ka jingïalam ki nonghikai ha ka Sngi Palei ki la pynlong da ka jingïaid rah plakad ha surok ha ki bynta jong ka Khyndailad halor ban pynsngewthuh paidbah ïa ki jingma kiba mih na u drok bad ka jingdih duma lane sikret.
Haba ïoh ban ïakren ïa ka Miss Jyoti Bhal kaba dei ka nonghikai ka la ïathuh ba ka jingthmu jong ka skul ka long ban pynkyndit bynriew ïa ki briew bad ban ong “em ïa u drok” hynrei “hooid ïa ka jingim”, ka la ïathuh ba ka skul ka ju pynlong man la u snem ïa kaba kum kane bad ka la kyntu ïa ki paidbah ban kiar ïa ki jingdih ba sniew kiba ap jingma ïa ka koit ka khiah.
La ïoh ban ïa kren ïa ki katto katne ngut ki samla pule, kiba la pynpaw ba kane ka prokram la pynlong da ka BK Bajoria School bad kane ka long ka sienjam ban ai jingtip sha ki paidbah bad ban ïakhun ban pynduh pyndam ïa u drok, ka jingdih duma bad kiwei ki jingdih kiba lah ban pynsniew ïa ka jingim ha kajuh ka por kiba la pynpaw ka jingkyrmen ba kane ka jingpynsngewthuh kan wanrah ïa ka jingkylla kaba bha sha ka imlang sahlang.
Shuh-shuh ki samla pule ki la ong, watla ki dang rit ha ka rta, hynrei ki ruh ki don ka bynta ban wanrah ïa ka jingkylla kaba bha ha ka shnong ka thaw bad ka Jylla. La bynrap ruh ba ki briew ki dei ban sumar ïalade da kaba kiar na u drok, dih duma, dih kyiad bad kiwei ki jingmlien kiba sniew. “Ngi dei ban treilang na ka bynta ka jingbha jong ka imlang sahlang bad ban pynlong ïa ka pyrthei kaba khuid bad kaba bha” ki la ong.
