Shillong, Jylliew 26
Ka Bharatiya Janata Party Meghalaya ka la lah ban nang pynkhlaiñ ïa ka jingtreikam jong ka ha kaba ka la lah ban pynkha ïa ka Mandal Committee pura jong ka 15-Mawlai Constituency.
Ha kane ka jingïalang ba la long ha ophis ka party ha ka Sngi Thohdieng, la ïadon lang ki nongïalam jong ka party ba kynthup naduh u President Ka BJP Meghalaya u Rikman Garrey Momin, u Bah Sanbor Shullai MLA ka South Shillong Constituency u ba long ruh u Myntri ka Sorkar Jylla, u Bah AL Hek MLA ka Pynthorumkhrah, u Bah Mariahom Kharkrang lem kiwei de ki nongïalam ba hakhmat jong ka Party.
Haba kren sha ki nongthoh khubor u nongaiktien ka BJP u Bah Kharkrang u la ïathuh ka jingïakren ban thaw ïa ka Mandal ba pura ka la ïaid la bun bnai bha bad kane ka sngi ka la urlong ba ka party ka la lah ban pynurlong bad la pynskhem ïa u Bah Synshar Maïong kum u President ha ryngkat ki 36 ngut ki nongïalam kiba dei ban don katkum ka rukom treikam jong ki Mandal.
Shuh-shuh u la pynpaw ba ka jingdon jong ka Mandal hapoh Mawlai, ka party kan lah ban pynsngewthuh ïa ki rukom treikam jong ka sha ki paidbah bad ruh ba ki nongïalam kin nang lah ban trei kham bha kham janai.
“Lada phi kynmaw ha ka ilekshon MDC ba dang shu dep, kiwei ki sengsaiñ pyrthei ki khlem pynïeng kyrtong shuh ha Mawlai bad ka dei tang ka BJP kaba nud ban pynïeng kyrtong watla ka khlem don ki nongtrei ba pura, hynrei mynta ba la don ka Mandal, ngim artatien ba ngin ïoh kyrtong uba bit ha ki ilekshon ki ban wan” la ong u Bah Kharkrang.
Nalor kata u la pynpaw ba ka BJP ka dei ka party kaba trei ha baroh ki por, wat hadien jong ka ilekshon u la ong, “Kiba bun ki nong Mawlai kiba wan sha nga ban pynsngew ba kim ïoh skhim, ki briew mynta ki la sdang sngewthuh haba ki kwah ïa ki kam pynroi ka BJP ka dei ka jubab.”
Haba jubab ki nong Mawlai haduh katno ki la pdiang ïa ka BJP, u la ong ba ka BJP kam kyrkieh ban ïoh ïa ka jingjop, hynrei kan ïai trei bad kan nym shongthait ban trei wat haba kan hap ban mad ïa ka jingshah rem ha ki ilekshon.
