Shillong, Jylliew 26
Ki arngut ki Samla ba la kyrni bha ha ki jingdih pynbuaid, ba kynthup ïa ka kyiad bad u drok, ki la iehnoh shi syndon ban leh ïa kum kine ki kam, ban dih drok bad dih kyiad.
Haba kren ha ka sngi rakhe ka Tnad Social Welfare ïa ka International Day Against Drug Abuse and Illicit Trafficking, kaba la long ha Community Hall Mission Compound, kine ki samla ki la ïathuh ïa kaei kaba ki ïakynduh ha ka por ba dih kyiad bad dih drok.
Uwei u Samla uba la kyrni ha u drok u la ïathuh ba u la bam duh lut ïa ki jingdon jingem ha ïing bad shu thiah kat shaba lap ba shem, khlem don nongpeit nongkhmih.
“Nga la ngop ha u drok naduh u snem 2012 bad ha ka jingïaid lynti jong nga bad ka jingshongshit paralok nga la kum ngop ha u drok. Ha ka jingïaid lynti, nga la shu pynjynjar haïing hasem bad kaei-kaei kaba ki ai ïa nga ruh na ïing ki la ïa leh katba lah bad nga bamduh lut,” u la ong.
U la ïathuh ba dei ha kawei ka por ba don uwei u paralok uba la ong ïa u, balei phim leit noh sha rehab ban shah sumar bad hadien kata u sa ïalam ha Khlieh Ïewduh ban shah ai jinghikai halor ka jingsniew jong u drok.
Une u Samla ba kyrni ha u drok u la pynpaw ïa ka jingsngewkmen hadien ba la ïoh ka jingpynsngewthuh ha Khlieh Ïewduh bad ban phah sumar noh ha rehab. “Hadien ba la mih na rehab ka la don ka jingshah pynshoi biang, hynrei kadei ka jingdon ryngkat jong U Blei hi nyngkong kaba nga long kumne kumba nga long mynta,” u la bynrap.
Na ka liang uwei pat u Samla uba la kyrni ha ka kyiad u la ïathuh ba u la shu thiah kat shaba lap ba shem bad ym don ki bahaïing ban khot ne ban ïa sah lang namar ka jingkyrni palat ban dih kyiad bad ki la isih lut ïa u. Hynrei u la ong ba lyngba ka jingai jinghikai ha Khlieh Ïewduh, kaba la ïarap ïa u ban kylla kaba mut.
Kumta baroh 2 ngut ki la ainguh ïa u Blei nyngkong ba dei lyngba jong u, ba ki sa long kumne kumba ki long mynta.
