Shillong, Jylliew 26
U nongïalam ka United Democratic Party (UDP) uba dei ruh u MLA ka Khliehriat, u Bah Kyrmen Shylla ha ka Sngi Thohdieng u la ong ba ka seng ka dang skhem ïa mynta, hynrei u la bynrap ba ka UDP ka don ka jingthmu ban sei kyrtong thymmai bad ban pynneh biang ïa ki ‘seat’ lada don kino-kino ki dkhot kiba rai ban mih noh hashuwa ka ilekshon.
“Na ka bynta jong nga, nga lah ban ong ba ka long kaba skhem, hooid. Nga don hangne bad ka long kaba skhem haduh mynta,” la ong u Bah Shylla haba kylli shaphang ka jinglong-jingman ka seng ïa mynta. U la kdew ba ki jingpynbeit ba shisha kin sa paw shai tang ha ka por ba thep ‘vote’.
“Lada phi kylli ïa kata ka jingkylli, ym tang ka UDP hynrei kano-kano ka seng saiñ pyrthei ka long kaba skhem ha la ka jong ka rukom. Dei tang ynda la wan ka ilekshon ba ngin sa tip. Ngim lah ban ong tikna mano ban leh aïu namarba kin ym ïasam satia ïa ki buit jong ki ha ka jingïalang jong ka seng. Kaei kaba phi don ha ka jingmut jong phi ka sah bad phi. Kumta ngim lah ban kren eiei haba ïadei bad ka jingmut jongno-jongno bad ngim lah ban ong eiei pyrshah ïa ki ruh,” u la ong.
U Bah Shylla u la ong ba ka UDP ka long kaba la khreh lada don kiba weng noh ïalade na ka seng.
“Hynrei ngi dang ap. Lada don kiba shim ka sienjam ban weng noh na ka UDP, te ngin hap ban pynïeng da uwei pat ha ka jaka jong ki. Ngi hap ban pyntikna ba kito ki nongthep ‘vote’ kiba la jied ïa ngi kin jied biang ïa u kyrtong jong ngi ha kano-kano ka konstitwensi bad ba ngin pynneh biang ïa ka ‘seat’. Kata ka dei kaba ngi kwah ban pyntikna,” u la ong.
“Lada don mano-mano kiba kren ne kiba kwah ban leit shano-shano, ngim lah ban ong eiei ïa ki. La shah ïa ki ban leh kumta. Hynrei kaei kaba ngi lah ban leh kum ka seng ka long ban pyntikna ba ngin pynneh biang ïa ka ‘seat’,” u la bynrap.
Halor ka jinglong nongïalam, u Bah Shylla u la kyrshan ïa u President jong ka seng.
“Ngan pyrkhat aïu shaphang jong u? U dei u President jong ngi bad ngi kohnguh ïa u. Ngi trei kum ka kynhun bad ngi shim lang ïa ki rai kum ka kynhun. Ngi pyntikna ba ki rai ba ngi shim da ma ngi baroh kin ai jingmyntoi ïa ki paidbah,” u la ong.
Haba kren halor ki khubor ba don ka jingbym sngewhun hapoh ka seng, u la ong, “Lehse ki don la ki jong ki jingsngew shimet, kumta ngim lah ban kren eiei. Hynrei kum ka seng, kum ka kynhun, ngi ïatylli kawei.”
Halor ka jingkynnoh jingphet seng bad ki jingïakren hapdeng ki para seng saiñ pyrthei, u Bah Shylla u la ong ba ki jingkynjoh ktien ki long kiba ju jia barabor ha ka saiñ pyrthei hynrei ka rai kaba khatduh ka shong ha ki briew shimet.
“Ngi lah ban kynjoh ïano-ïano. Ngi lah ban kynjoh ïa ki MLA ka NPP ne ki MLA ka BJP, ïano-ïano ba ngi kwah. Hynrei ka rai jong ki ka dei ban don ka jingktah. Kumba long mynta, uno-uno u lah ban wan shano-shano. Ai ba kin pyrkhat. Tad haduh ba kin da kynthih, ngim pat lah ban ong eiei,” u la ong.
“Ai ba kin pyrkhat. Ngi ruh ngi don la ka jong ka buit. Ka UDP ka don la ka jong ka buit treikam. Lada don kiba thmu ban kynriah, ngin pyrkhat kumno pat ban pyndap biang ïa ka jingduna. Kumba nga la ong, ngi kwah ban pynneh ïa ka ‘seat’ bad na ka bynta kane, ngi don la ka jong ka buit treikam,” bynrap u Bah Shylla.
