Shillong, Jylliew 26
Ka jingïaid ki kali lyngba ka surok ba shipor na Laitlyngkot, Iew Mawiong, Umthli, Nongthymmai bad sha National Highway Point ha Laitkynsew ha ka 25 tarik u Jylliew, 2026, ka la long kaba ïaid beit ryntih, hadien shi sngi ba la plie ïa kane ka lynti ïaid na ka bynta ki nongleit nongwan hadien ka jingdkut noh jong shi bynta ka surok Shillong-Tamabil hajan Laitlyngkot.
Ïa kane ka surok ba shipor la plie hadien ba ka National Highways and Infrastructure Development Corporation Limited (NHIDCL), ka la pynpaw ba kan shim por ban pynbha biang ïa ka bynta jong ka surok kaba la julor.
Ka jingdkut ka surok ka la jia ha ka bynta kaba don harum ka jingkieng Umthli hapoh ka Package-II jong ka projek Shillong-Tamabil Road, kaba la ktah jur ïa ka jingïaid jingïeng hapdeng ka Shillong, Pynursla bad Dawki.
Lah ban kdew ba u Symbud Myntri Rangbah ka Jylla, u Bah Prestone Tynsong, u la leit jurip ïa katei ka jaka ha ka 22 tarik u Jylliew, 2026 ha ryngkat bad ki bor pynïaid District ka East Khasi Hills, ki ophisar na ka NHIDCL, PWD Roads bad kiwei ki tnad ba dei khmih.
Ha katei ka jingjurip, u la kubur ba ka jingjulor ka jur bha bad ym lah satia ban pynbha mardor, kaba la pynlong ïa ka Sorkar ban wad da kiwei pat ki lynti ban ïaid paidbah.
Ka surok ba shipor ka pynïasoh biang sha ka surok bah kadei lyngba ka lynti kaba ïaid na ka par maw jong u Bah Khrikshon Lyngkhoi ha Laitkynsew.
Na ka liang ka FKJGP Riwar Mihngi Circle ka la pynpaw ka jingsngewnguh ïa u Bah Khrikshon L. Lyngkhoi, namar ka jingïatreilang jong u, ban shah pyndonkam ïa katei ka lynti, kaba la long ka jingïarap kaba khraw ïa ki paidbah ka thaiñ ha kaba ïadei bad ka jingïoh rung jingïoh mih jong ki marbam, ka jingïarap ïa ki nongpang bad ki kam kyrkieh.
Katkum ka jingpynbna paidbah jong u SDO ka Pynursla Civil Sub-Division, u Bah Gautam Warjri, ïa kane ka surok ba shipor yn shah tang ïa ki kali rit ban ïaid.
Ïa ka surok yn khang naduh ka por 10 baje mynstep haduh 4 baje janmiet bad naduh 10 baje mynmiet haduh 5 baje mynstep ban pynïaid shakhmat ïa ki kam shna surok.
Shuh shuh, ka lynti na Laitlyngkot-Pomlum yn shah tang ïa ki kali kiba rit bad kiba pdeng, katba ka surok Pomlum-Mawlieh ka dang plie na ka bynta baroh ki jait kali kynthup ïa ki kali heh.
Ka jingïaid kali na baroh ar bynta jong ka jaka ba julor, yn shah tang haduh ka por 10:30 mynstep man ka sngi shuwa ba kin sdang ïa ki kam shna surok.
