Shillong, Jylliew 26
U MLA ka Khliehriat uba long ruh u nongïalam ka UDP, Bah Kyrmen Shylla ha ka Sngi Thohdieng u la ong ba ka Sorkar Jylla ka la shimkhia ban pynbeit ïa ka jingeh haba ïadei bad ka kam tih par, hynrei u la ban jur ba ïa ka rukom tih ‘Open-cast’ ba la mynjur da ka Sorkar Pdeng yn ym lah ban pyntreikam ha East Jaiñtia Hills namar ki jingeh ha ka jinglong-jingman ka jaka.
“Mynta ka Sorkar ka la ïaid shakhmat bad ka kam. Ha kano ka kyrdan, ngam tip, hynrei ka Sorkar ka trei ïa ka kam jong ka,” la ong u Bah Shylla haba pan por.
“Ngim lah ban khmih lynti ba kiei-kiei kin jia tang hapoh khyndiat sngi, hynrei ngin ai por ïa ka Sorkar. Ai ba ka Sorkar kan leh ïa kaba donkam. Ynda la dei ka por, kin sa pyntip sha ngi halor kaei kaba la leh. Kumba ka long mynta, ka Sorkar ka la leh ïa ka kamram.”
U la ong ba ki jaka ba don dewïong ha Meghalaya ki dawa ïa ka rukom treikam kaba pher na kiwei pat ki Jylla.
“Ka dei ka jingtih par shapoh khyndew, hynrei ka lah ban ym long kum ha kiwei pat ki Jylla. Ngi don ka syrtap kaba rit, hynrei ngi long kiba kloi ban ïaid shakhmat da ka jingtih par katkum ka juk stad saian katkum ki jingbthah kiba la buh da ka Sorkar Pdeng. Hynrei ka dei ban long kaba lah ban leh ha ka thaiñ jong ngi,” u la ong.
U Bah Shylla u la pynpaw ruh ba ki jingpyrshang ïa ka rukom tih ‘Open-cast’ ki la dep ban pulom.
“Dang shen ki la ai sha ngi ïa ka jingtih par ‘Open-cast’. Ngi la ïohi bad ngi la pyrshang, khlem artatien. Ngi pdiang bad ngi la pyrshang, hynrei ngim lah ban pyntreikam. Hadien ba la ïohi ba ym lah ban pyntreikam ha ka thaiñ jong ngi, kata ka la pynlong ïa ngi ban kyrpad ïa ka Sorkar ban pynkylla noh katto-katne,” u la ong.
“Lym kumta, lada ka long kaba lah ban leh, balei ngin donkam da kawei pat ka lad? Ngin jyn da la leh ïa kata,” u la bynrap.
“Hynrei haba ngi ïohi ïa ka jinglong-jingman, bad ba ïa kane rukom kaba la don lypa yn ym lah pyntreikam, ki briew jong ngi ki la sngewthuh ba kane kan ym jia. Dei na kata ka daw ba ngi la leit bad kyrpad ïa ka Sorkar ban ai ïa ngi ka lad kaba pher ha kaba ngi lah ban tih par katkum ka jingdonkam jong ka thaiñ jong ngi,” u la ong.
U la ong ba ka rai mynta ka shong ha ka Sorkar.
“Ngam tip kaei ka lynti kaba hadien nangne. U Myntri Rangbah ka Jylla un long uba biang tam ban jubab ïa kane. Hynrei ka kamram jong ngi, khamtam na ka bynta ki briew jong nga na East Jaiñtia Hills bad ka ‘Forum’ jong ka Jylla, ngi la leh ïa ka kamram jong ngi da kaba aiti ïa ka dorkhast sha u Myntri Rangbah ka Jylla, halor kumno ba dei ban ïaid shakhmat bad ka jingtih par,” ong u Bah Shylla.
