Nongstoiñ, Jylliew 28
Ka Synjuk ki Nongsynshar Shnong Nongmynsaw Syiemship ha ka sngi Saitjaiñ jong ka taiew kala leit sha ka ophis u Executive Engineer PWD (Road) Mawshynrut Division, Mawshynrut, ban pynsngew hakhmat jong u ïa ki jingeh ka dong ka thaiñ khamtam ha ka thaiñ Langpih, ha kaba la ïoh ban ïakynduh.
Ki nongïalam jong ka Synjuk ki la pynpaw ba ha katei ka jingleit ïakynduh ïa u Executive Engineer jong ka tnad PWD la pynsngew ïa ki katto katne ki mat ba kongsan kiba ïadei bad ki jingdonkam ba kongsan eh jong ka thaiñ.
Ki la ong ruh ba ki katto katne ki mat ïa kaba la pynsngew ki kynthup ban maramot bad pynbha ïa ka surok Ktiehthawiar sha Langpih, ha kaba la ong ba kane ka surok ka long kawei na ki surok ba kongsan haduh katta katta ïa ka thaiñ Langpih hi baroh kawei hynrei mynta kala jot bad pra lut kaba ym lah shuh ban ïaid ki kali khamtam lada dei ki sngi ba jur slap.
Ki la ong ruh ba ïa kane ka surok la ïoh ban siang rong naduh u snem 2010 bad haduh mynta kam pat shym la ïoh ban maramot ïa ka wat tang shisien ruh kumta ka jingjot jingpra jong kane ka surok kala long kaba la shyrkhei haduh katta katta.
Shuh shuh ki la ïathuh ruh ba ha kaba ïadei bad kane ka surok, na ka liang u Executive Engineer PWD (Road) Mawshynrut Division, u la ïathuh ba ka ophis kala dep ban pynbiang ïa ki kot ki sla bad phah sha ki bor bahalor ban ïoh ïa ka jingmynjur ha kaba u la pynthikna ruh ba na ka liang jong u, un shimkhia ban buddien ba kan kham kloi ka kam.
Nangta, kaba ar pat ka long ban trei pyndep noh ïa ka surok thymmai na Langpih sha Mawdiangsnam, ha kaba la ong ba kane ka surok ka long kaba la mang ban shna na Ïew Langpih shaduh ka surok ban leit sha Mawdiangsnam hynrei haduh mynta ym shym pat la pyndep sa kumba 300 metre eiei na lad Mawdiangsnam ban siang rong.
Ha kaba ïadei bad kane ka surok, na ka liang ka Synjuk kala pynpaw da kaba ong, “Ngim sngew ïahap ba ka Sorkar kan shu aidaw haba ngim shym la pat ïohi dak eiei ba la sdang bteng ban trei ïa kane ka surok bad kumba ka long baroh shi katta bun bah ki kam pynroi kiba ka Sorkar Assam ka trei ha ka thaiñ balei pat lada trei ka Meghalaya ki pyndik.”
Shuh shuh ki nongïalam shnong ka thaiñ ki kyntu ba ka Sorkar kan bteng beit ban trei ïa kane ka surok na Langpih lad Mawdiangsnam sha Mawdiangsnam, bad ka dei ban sngap ïa ka jingdawa jong ki paidbah nongshong shnong ym ban sngap ïa ka Sorkar Assam.
Kaba lai pat, na ka liang ki nongïalam ka Synjuk ki la ong ban pynsted ban pyntrei noh ïa ki surok PMGSY-IV bala dep jurip ha ki snem bala dep.
“Kum ki Nongïalam shnong ngi sngewkmen ba na ka liang ka tnad ba dei peit ka la jurip (survey) na ka bynta ki surok PMGSY ha ka thaiñ, kiba kynthup ïa ka surok Mawdiangsnam sha Umyiap, Mawsikar sha Umbyrsit, Mawlan-A sha Umwali, Langpih sha Mawdiangsnam, Langpih sha Nongma, Iewnongma sha Nongmawlein, bad kiwei kiwei,” ki la ong.
Ki nongïalam ka Synjuk ki la ong ba halor kine ki surok, na ka liang u Executive Engineer ka Mawshynrut Division u la pyntikna ba kin ïaid beit shakhmat bad urlong shen.
