Nongpoh, Jylliew 28
Uwei u rangbah briew uba la don kumba 50 snem eiei ka rta u la khlad noh hashen hadien ka jingshah tylliat ha ka trok kaba dang kiew sha nongbah Shillong ha Nongpoh.
Katkum ka tyllong khubor, la ïathuh ba katei ka jingjia ka dei kaba la jia ha ka por kumba 7:30 eiei janmiet katba utei u rangbah uba la tip kyrteng kum u Christopher Diengdoh u dang thmu ban jam sha shilliang ka surokbah National Highway 6 kaba dang hap ha ka dong Mawkapiah jong ka shnong Nongpoh.
La ïoh jingtip ruh ba katei ka trok kala phet krad na katei ka jaka hadien katei ka jingjia bad ka na liang ki pulit ki dang pynlong ïa ka jingthwet ban lapdien ïa ka. Ïa ka met kaba sah jong utei u rangbah uba la duh noh ïa la ka jingim, la pynkit noh sha Civil Hospital Nongpoh na ka bynta ban pyndep ïa ki jingdonkam katkum ki kyndon ain bad ka jingtohkit halor kane ka jingjia ka dang ïaid shakhmat.
