Shillong, Jylliew 28
U Myntri Rangbah ka Jylla, u Conrad K. Sangma u la ai khublei ïa u Myntri Rangbahduh ka ri, u Narendra Modi uba la kren shaphang ki jingkieng-jri jong ka Meghalaya ha ka bynta bathymmai jong ka ‘Mann Ki Baat’, da kaba ong ba kane ka jingithuh ka ai burom ïa ki jaidbynriew Khasi bad Jaiñtia haba ïadei bad kane ka riti-dustur kaba la neh la da ki phew-phew snem mynta.
Ha ka jingthoh ha ‘X’ ha ka Sngi U Blei, u Sangma u la ong ba u “sngewnguh shi kat dei eh” ïa u Myntri Rangbahduh uba la pynpaw shaphang ka ‘Jingkieng Jri’ ha ka por ba u ai jingkren lyngba ka ‘Radio’.
Da kaba ñiew ïa ki jingkieng kum “ka jingai sngewbha na kawei ka pateng sha kawei pat,” u Myntri Rangbah u la ong ba ki “jaidbynriew Khasi-Jaiñtia ki la pynheh-pynsan suki-suki ïa kine ki jingkieng da ki phew snem.”
“Ki kyntien jong phi ki burom ïa ka jingngeit jong ki ban ïa im lang ha ryngkat ka suk ka saiñ bad ka mariang,” u la thoh da kaba kdew ïa u PM @narendramodi bad @PMOIndia.
U Sangma u la bynrap ba ka Meghalaya ka dang trei ruh ban pynïoh ïa ka kyrdan ‘Heritage Status’ ha ka UNESCO na ka bynta kine ki jingkieng-jri.
“Katba ngi dang rah ïa kane ka pateng shakhmat sha ka UNESCO, ka Meghalaya baroh kawei ka ïeng da ka jingsngew sarong,” u la ong.
Ki jingkieng-jri, ba la pynwandur da kaba thaiñ ïa ki tynrai jong ki dieng jri na shiliang sha sha shiliang wah, ki don ha ki distrik ba shathie jong ka Jylla.
La ñiew ïa ki kum ka nuksa jong ka jingpynwandur ka ban neh ban sah, ka jingpyntreikam ïa ka ‘bioengineering’ na ka liang ka imlang-sahlang bad ki long shi bynta jong ka jingtyrwa ba pura jong ka Meghalaya na ka bynta ban ïoh rung ha thup ‘World Heritage’ jong ka UNESCO.
