Khliehriat, Jylliew 28
U Deputy Commissioner (Election), East Jaiñtia Hills u la pyntip ba ka Election Commission jong ka India ka la bthah ban pynlong ïa ka Special Intensive Revision (SIR), 2026 jong ka Election Roll ha baroh ki Jylla.
Kum shibynta jong kane ka jingbthah yn pynlong ïa ka Special Intensive Revision ha ki artylli ki Assembly Constituencies hapoh East Jaiñtia Hills District ka 5-Sutnga Saipung (ST) bad 6-Khliehriat (ST) Assembly Constituency.
Ka tarik ha kiba kino-kino kiba kynjoh 18 snem ki lah ban pynrung kyrteng (Qualifying Date)-01-10-2026. Ka jingrung ha man la ki thliew ïing (House Visit) da ki BLO: 30-06-2026 haduh 29-07-2026.
Ka jingpynbeit ryntih ïa ki Polling Station kan long ha ka 29-06-2026. Ka jingpynmih ïa ka Electoral Roll ba la pynwandur (Draft electoral Roll) kan long ha ka 05-08-2026.
Ban pdiang ïa kino-kino ki jingujor ne jingdawa na ka bynta kito kiba la kum klet ban shim kyrteng ne iehnoh ïa ki kyrteng ha ka por ba pynkhreh ïa ki Electoral Roll ne bakla ha ka spel dak, snem bad kiwei-kiwei (Filing of Claims & Objections) kan long ha ka 05-08-2026 haduh 04-09-2026.
Ka jingbishar bad peit bniah ïa kino-kino ki jingujor ne jingdawa (Disposal of Claims & Objections) kan long ha ka 05-08-2026 haduh 03-10-2026. Ka jingpynmih ïa ka Electoral Roll ba la dep pynbeit pynbiang nadong shadong (Final Electoral Roll) kan long ha ka 07-10-2026.
Ki Booth Level Officers (BLO) kin rung ha kawei pa kawei ka thliew ïing bad kin sam ïa ki Enumeration Forms (Artylli) sha ki nongthep vote bad ki nongthep vote kin hap ban pyndap ïa kito ki Enumeration Form ha kaba kawei kin bat halade bad kawei pat kin ai ha ki BLO. Tang ka kyrteng jong kito ki nongthep vote kiba la ïoh pdiang ïa ki Enumeration Form yn pynmih ha ka Draft Roll.
Ïa ka Draft Roll yn sa sam sha ki BLO, ki nongmihkhmat jong ki Political Party bad sha ki Waheh Shnong. Yn wah ruh ha ophis jong u Deputy Commissioner bad ha ki ophis jong ki Block Development Officers.
Lada ym don ka kyrteng lane ym biang ka kyrteng snem bad kiwei-kiwei, u/ka nongthep vote kin hap ban ujor da kaba pyndap ïa ki Form 6, Form 7 bad Form 8 katkum ka jingïahap ka jingujor bad ki BLO.
Ka ophis u Deputy Commissioner (Election), East Jaiñtia Hills ka kyrpad ïa baroh ki nongthep vote ba kin shimkhia ïa kane ka kam bad uba soi kyrteng harum bad kyrpad ruh ïa ki Waheh Shnong, ki nongmihkhmat ki political Party, ki Seng Trei Mon sngewbha, ki Seng Longkmie, ki nongpynïaid Balang ba kin ai ka jingkyrshan ïa ki BLO bad ruh ïa ki paid nongshong shnong ha ka ban pynlong ïa kane ka Special Intensive Revision kaba jop bad ban ïoh ka Roll kaba bit ba biang.
