Nongstoiñ, Jylliew 29
Hadien ka jingsaphriang ka dur khih kaba la saphriang sted ha ki rynsan social media kaba pyni ïa kawei ka samla kynthei kaba shah thombor ha surok Nongstoiñ Bypass, ki dkhot ka Village Defence Primary Committee (VDPCNA), ryngkat ka jingïarap jong ka Village Defence Party (VDP) jong ka shnong Mawkadiang kila ïoh ban bat noh ïa u briew uba la paw ha ka durkhih ban shoh ïa ka kynthei, ha ka sngi Nyngkong jong ka taiew ha ka por kumba 9 baje eiei mynstep ha kaba ki dkhot ka VDPCNA kila aiti noh ïa u sha ki pulit ka Nong-stoiñ ban pynlong ïa ka jingtohkit kaba bniah.
U President ka VDP CNA Bah Mawkordor Kharsyiemlieh u la ïathuh ba kane ka jingjia kala jia ha ka sngi U Blei, ka 28 tarik u Jylliew ha ka por kumba 6 baje janmiet ha shilynter ka surok Nongstoiñ Bypass kaba don hajan ka madan Nongpathar ha Pyndengrei. Shuh shuh u la pynpaw ruh ba ka VDPCNA kala maham ïa kino-kino ki riew shimet kiba leh ïa ki kam beaiñ ne ki kam khlem akor ha ki bynta jong ka Nongstoiñ Bypass bad u la maham ruh ba lada lap ïa kiba kum kita ki briew, ka VDP kan nym aili hynrei kan leh da kaba tyngeh ban pynthikna ïa ka jingshngaiñ jong ki paidbah.
