Nongstoiñ, Jylliew 29
U Superintendent of Police (SP) ka West Khasi Hills District Bah H. Kharkongor ha ka kyrwoh khubor ba la phah u la pyntip ba u khynnah shynrang uba la ïoh bat da ki dkhot ka VDPCNA u dei uba la tip kyrteng kum u Fasdingson Wanniang (23) na ka shnong Mawkadiang, West Khasi Hills District bad u dei ruh u lok barim jong ka lanot kaba shah shoh kaba dang 22 snem ka rta, bad kitei ki arngut ki la shong khlad mynta la palat shisnem shiteng.
Shuh shuh u SP ha ka kyrwoh khubor u la pynshai ba kiwei pat kiba la paw ha ka dur khih la dep ban tohkit ïa ki bad la lap ba ki dei ki riew shimet kiba la sakhi bad lap ha katei ka jaka ba la jia katei ka jingjia.
Ka kyrwoh khubor na u SP ka ong ba katkum ka jingtohkit la lap ba katei ka lanot kaba shah shoh kala leitkai bad la ki paralok jong ka haba ki la ïakynduh ïa utei u briew uba dei u lok barim jong ka ha kaba u la sdang ban beh kthong ïa ka bad thombor ïa ka ynda u la lap.
Nangta, u la ong ruh ba namar ba ym shym la ïoh pdiang kano-kano ka jingujor ejahar ha kino-kino ki thanad hapoh ka District, ki pulit ka Nongstoiñ ki la register da ka ‘suo moto’ case ha thanad Nongstoiñ Case No. 43(6)2026 katkum ki kyndon 74, 135, bad 109 jong ka BNS.
U SP u la pyntip ruh ba la pynbiang lut ïa ki jingïarap kiba donkam sha kane ka lanot bad la phah ruh sha ka ‘One Stop Centre’ ha Nongstoiñ, na ka bynta ban ai jingsyllok ïa ka.
Halor kane ka khubor, ka kyrwoh na u SP ka la kyrpad ïa paidbah ba kin ym pynsaphriang paidbah bad weng noh ïa ka durkhih (video) kaba la saphriang ha ki rynsan pathai khubor ne ki rynsan ai jingtip (social media) kaba pyni ïa ka jingshah shoh jong kawei ka samla kynthei kaba 22 snem ka rta, kaba la jia ha ka 28 tarik Jylliew, 2026 ha ka surok National Highway-44E, Nongstoiñ Bypass.
Shuh shuh ka kyrwoh na u SP ka la maham ba ka jingpynsaphriang paidbah ïa kum kine ki video ka long pyrshah ïa ka aiñ bad kiba leh ïa kane kin ngat ha ka jingpynshitom katkum ka Bharatiya Nyaya Sanhita bad ka Information Technology Act bad u la pynkynmaw ruh ba ka jingpynpaw ïa ka kyrteng jong ka lanot ka long pyrshah ïa ka aiñ. Nangta, ka kyrwoh ka kyntu ïa paidbah ba kin ym pynsaphriang paidbah ïa kino-kino ki jingtip kiba ym pat lah ban pynthikna, namar kane ka lah ban ktah ïa ka lanot bad pynthut ïa ka jingtohkit kaba dang ïaid.
Shuh shuh la ong ruh ba lada don kino-kino kiba don jingtip halor kane ka jingjia, ki lah ban pyntip sha ka Police Control Room ha u nombar 9366498499 ne phone sha 112 bad yn buhrieh ïa ka kyrteng jong kiba ai jingtip.
U SP ha ka kyrwoh u la pynpaw ruh ba ka tnad pulit ka West Khasi Hills ka pynthikna ba yn shim da ki sienjam kiba tyngeh pyrshah ïa kiba donkti katkum ka aiñ bad ka kyrpad ïa ki paidbah ban ai ka jingïatreilang ha ka ban ym pynsaphriang paidbah ïa kum kine ki durkhih.
