Shillong, Jylliew 29
U Myntri ba khmih ïa ka koit ka khiah ka Sorkar Jylla, u Bah Wailadmiki Shylla ha ka sngi Nyngkong u la pynthikna, ba ka Sorkar Jylla ka la kyntait ïa ka jingtyrwa ba pan ram ba khlem sut ka University of Science Technology Meghalaya (USTM), kaba kot T.200 klur, na ka bynta ban tei ïa ka PA Sangma International Medical College & Hospital (PIMC).
“Haba sdang ka la don ka jingïakren, hynrei hadien ba ka Sorkar ka la kyntait ïa ka, kam shym la don kano-kano ka jingkyrshan,” la ong u Bah Wailadmiki Shylla haba kren sha ki lad pathai khubor kiba kylli shaphang kane ka jingtyrwa ka USTM.
U la ong ba ïa kane ka rai la shim da ka jingïalang ba hashuwa jong ka Kynhun Myntri. “Ha ka jingïalang ba hashuwa jong ka Kynhun Myntri, Ngam pat don bynta ha ka. Hynrei ka rai ba la shim ka long, ban kyntait ïa ka jingtyrwa ban ai ram ba khlem sut sha ka USTM” u la ong.
Namar ka jingbym tip ïa kiei kiba la ïakren ha ka jingïalang, u Bah Wailad u la kdew ïa ka jingduna pisa lehse ka lah ban dei ka daw.
“Ngam pat don bynta ha ka Kynhun Myntri ha katei ka por, kumta ngam da tip bha ïa kaei kaba ïakren. Hynrei ka lah ban don kaba shonghok. Ka Meghalaya kam dei ka Jylla kaba tam ka jingpynmih pisa, ngi dei kaba duna ka jingpynmih pisa” la ong u Bah Wailad.
“Ngi don ruh ïa bun kiwei ki kam ba kongsan ba hap ban pynleit jingmut bad ban kynshew. Naba ka USTM kadei ka jaka pule shimet, ka Sorkar ha katei ka por lehse ka lah ban sngew, ba ka la ban pynïoh ïa ka pisa lane kyrshan pisa na kiwei ki thymmei. Nga tharai ka dei kata ka daw, ba ka Sorkar ka la shim ïa ka rai” u la bynrap.
