Nongpoh, Jylliew 29
Ka ophis treikam jong ka District Medical & Health Officer (DMHO) ka Ri Bhoi District ha ka sngi Nyngkong kala plie paidbah ïa ka prokram ai dawai jingïada na ka jingpang Polio ha ka district ïa kaba la tip kum ka National Immunisation Day (NID) Pulse Polio Campaign hapoh ka phang pdeng “Every Drop Counts, Every Child Matters”.
Ha kane ka prokram kaba la pynlong ha Nongpoh Urban Health & Wellness Centre ha Umlyngkdait, la wan ban ïashim bynta lang da u Dr. Abhishek Saini, Deputy Commissioner ka Ri Bhoi, ka Dr. A.R. Marak DMHO ka Ri Bhoi nalor kiwei-kiwei ki heh ophisar ka koit ka khiah, ki kmie lem bad ki khynnah rit.
Haba ai jingkren ha kane ka sngi, u Dr. Abhishek Saini u la ban jur halor ka jingdonkam ban ai ïa ka dawai Polio bad kyntu ïa ki kmie ki kpa ha ka district hi baroh kawei ba kin shimkhia ba ki khunrit ki jongki, kin ïoh ïa kane ka dawai jingïada, da kaba bynrap ba tang ar sien pynjaw, kane ka dawai ka lah ban ïada ïa ki khynnah na ka jingpang ba shyrkhei kum ka Polio.
