Shillong, Jylliew 29
U Myntri Rangbah ka Jylla u Conrad K Sangma u la ong ba ka Sorkar Jylla ka la sdang ïa ka jingïatreilang bad bun tylli ki tnad treikam ban weng ïa ki ‘cable’ bym treikam, ki ‘wire’ ba la pyndait bad ki jingtei bym pyndonkam ha kylleng ka nongbah Shillong, hashwa ka jingwan ka National Games.
Ha ka jingthoh ba u Myntri Rangbah u la buh ha ka rynsan X hadien u la ong ba ka jingthmu jong kane ka sienjam ka long ban pynbha ïa ka dur ka nongbah. “La pynïaid ïa ka jingïalang ha ka jingdonlang u Deputy Commissioner ka East Khasi Hills, ka MeECL, ki nongpynïaid ïa ki ‘cable’, ki nongpynbiang DTH bad ki nongpynbiang ‘internet’ ban sdang ïa ka jingpyrshang kaba ïatreilang ban weng noh ïa ki ‘cable’ bym treikam, ki wire kiba sahkut bad ki jingtei bym pyndonkam ha kylleng ka nongbah Shillong,” la ong u Conrad.
U Myntri Rangbah ka Jylla u la ong ba ïa ka jingpynkhuid ym lah ban pyndep mardor, hynrei dei ban sdang noh bad ong ba kane ka dei ka jingeh kaba la neh slem bha, watla ym lah ban pynbeit tang shi miet, hynrei la dei ban sdang ban weng la ka dei ha kano-kano ka jaka.
U Conrad u la ong ba ka Sorkar ka la ïaleh katba lah ban kyntiew ïa ka jingitynnad jong ka nongbah Shillong na ka bynta ki nongwan jngohkai bad ki nongshong shnong kumjuh ba ha nongbah Shillong yn pynlong ïa ka National Games. “Da ka jingwan jong ka jingïalehkai jong ka Ri, ngi shimkhia ban pynbha ïa ka dur jong ka nongbah lyngba ka rukom treikam kaba ïaid lyngba ki bynta, kaba lah ban leh,” u la ong.
U Myntri Rangbah u la khot ïa baroh ki tnad kiba donkti ban ai ka jingïatreilang ha kane ka jingleh ban pynthikna ba ka nongbah Shillong kan pyni ïa ka dur ka jingkhuid ha ka por ba pynlong ïa katei ka jingïalehkai.
