Shillong, Jylliew 29
Ka All Meghalaya Alive and Fresh Fish Supplier (AMAFFS) ka la ujor da ka ejahar ha Jhalupara Police Outpost ha ka janmiet jong ka 29 tarik Jylliew, halor ka jingshah pyndik ki kali kit dohkha ha shiteng lynti kumjuh haba ïadei ka jingshah byrngem haba ki kyntait ban siew pisa.
U Bah Nangkitbok Hoojon u ba long u Vice President AMAFFS u la ïathuh ba ha ka janmiet jong ka 25 tarik, ki la don ki briew kiba bat ïa ki kali kit dohkha bad pan pisa ïa ki nongñiah kali bad haba ki nongïalam jong ka seng ki la leit sha katei ka jaka ban ïakren sngewthuh jingmut, pynban u wei na ki dkhot jong ki u la shah ktah kti ha kitei ki briew.
Katkum ka jingïathuh u Bah Hoojon, kitei ki briew ki kam ïalade ba ki dei ki dkhot jong ka Ri Bhoi Youth Federation (RBYF), shuh-shuh u la ïathuh ba haba ïadei kane ka kam ki la ïoh ban ïakren bad ki nongïalam jong katei ka seng ban ïakren phylliew jingmut mynne ka sngi hynrei ki khlem pynlait por satia, dei halor katei ka nongrim ba ka Association kam banse ban buh da ka ejahar.
Shuh-shuh ka Kong Rina Kharbudnah kaba dei ka Secretary AMAFFS ka la ïathuh ba kane ka jingshah pyndik ki kali kit dohkha ka jia la bun sien bha. Ka la ong ba kitei ki briew ym tang ba ki pan pisa hynrei ki pynphai ïa ki kali kit dohkha bad ki byrngem byrsit ruh lada kim siew ïa ka pisa kaba ki pan 4000 tyngka shi kali.
Ka la ïathuh ba ha katei ka miet ïa ka bad uwei u dkhot ka Association ki la shah byrngem pynjah klep ha kitei ki briew bad dei halor ka nongrim na ka bynta ka jingshngaiñ ha ka leit ka wan ki sa leit ban ujor ejahar.
Ka la ong ruh ba kumba ka Association ka la pyrshang ban ïakren sngewthuh jingmut hynrei ki aidaw bad ka la kyntu ruh ba kin mih shakhmat ban ïakren bad lada kim leh kumta ka Association kan sa thad ïa ki jingïakren bad ki durkhih (Video Record) ba ki la ïoh ring ha katei ka miet ba ki ktah kti ïa u dkhot jong ki.
