Shillong, Jylliew 29
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor na ki pulit la ong ba ha ka 25 tarik mynta u bnai, ha ka por kumba 6.50 janmiet eiei, uwei u nongñiah arshaka mar ïa ïohi ïa ki pulit pynïaid kali ha shnong Umthli ha East Khasi Hills, u la phet krad noh na kane ka jaka da kaba ieh noh shadien ïa ka arshaka kaba don ïa u registration number AS31-D-5659.
Ha kawei pat ka khubor, ka Phraigeta Marak ka la ai ka jingujor ba ha ka 7 tarik mynta u bnai, ki runar bym lah ban ithuh, ki la prong tuh ha ka jaka sah jong ka (quarter) kaba don hajan jong ka Ward’s Lake, Shillong bad ban tuh ar tylli ki camera, ki coin bad ka pisa bad baroh ki shongdor kumba T.1 lak eiei.
Ha kawei pat ka khubor, ka la don ka jingujor ba ha ka 7 tarik mynta u bnai, ha ka por kumba 11.25 mynmiet, uwei u runar bym lah ban ithuh, u la pynjot ïa ka ‘shutter’ jong ka kor CDM, katba u dang sei pisa na ka ATM kaba la pyndait ha Lumdiengjri, Shillong.
Ha kawei pat ka khubor, u Medistar Kharduit u la ai ka jingujor ba ha ka 27 tarik mynta u bnai, ha ka por kumba 2 baje dang step, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-U-1387 na phyllaw jong ka jaka sah ka jong u, kaba don ha Mawpdang, Mawmylliem (EKH).
Kumjuh ruh na ka liang jong u Rickostar Wanñiang u la ai ka jingujor ba ha ka 27 tarik mynta u bnai ha ka por kumba 9 baje mynstep, ki runar bym lah ban ithuh, ki la pynpait ïa ka ïit kaba nadien jong ka kali ka jong u, kaba don ïa u registration number ML05-AC-2979, kaba la pynïeng hajan jong ka Karbi House, Shillong. Na ka liang jong u nongujor, u la ïathuh ba ka pla laptop, service booklet, raincoat, bad ki kot ki sla jong ka kali bad kiwei-kiwei ki tiar, ki la jah na ka kali.
U Manager Prakash Sharma jong ka Harishava Road, Laban, Shillong u la ai ka jingujor ba ha ka 27 tarik mynta u bnai, ba ki lai ngut ki runar bym lah ban ithuh, ki la tuh ïa ki marbam mardih kiba shongdor haduh kumba T.40,000/- na ka kudam ka jong u.
Na ka liang jong u Superintendent jong ka Khliehriat Civil Hospital (EJH) la ai ka jingujor ba ha ka 24 tarik mynta u bnai, ha ka por kumba 10.30 mynstep, la lap ba ka tala jong ka jaka buh tiar ka hospital ka la shah pynpait bad ha kaba shibun ki tiar jong ka hospital ki la jah.
Na ka liang jong u Roger Benny A Sangma u la ai ka jingujor ba ha ka 25 tarik mynta u bnai, ha ka por kumba 12.30 shiteng synnia, ki runar bym lah ban ithuh, ki la tuh saw tylli ki mobile phone kiba dei jong ki nongtrei jong u na kawei ka jaka trei kaba don ha Dakopgre, Tura (WGH).
