Shillong, Jylliew 29
Haba maham pyrshah halor ka jingshaniah tylli-tyllan ha ki kam tih marpoh khyndew, ka MLA ka Sutnga-Saipung, ka Kong Santa Mary Shylla ha ka Lah Sngi U Blei ka la ong ba ka East Jaiñtia Hills ka dei ban pynïar ïa ki lad ki lynti ha ka ïoh ka kot jong ka namar u dewïong “un ym neh junom”.
Ha kajuh ka por, ka la pynbna ïa ki jingthmu ban pynbha ïa ki kshaid bad ki krem ki kroh ki bym pat don ba poi kum shi bynta ban kyntiew ïa ki kam jngohkai pyrthei.
“U dewïong un ym neh junom. Kine ki dei ki marpoh khyndew – ngim tip lano kin dang don bad lano kin ym don shuh. Mynta, u dei u dewïong, lashai u lah ban long u mawshun ne kiwei pat,” ong ka Kong Shylla ha ki nongthoh khubor.
“Nga kyrpad jur ïa ki briew jong ngi ban kynriah ïa ka kam khaïi jong ki shane-shatai namarba ngim lah ban shaniah tylli tang ha u dewïong,” ka la bynrap.
Ka Kong Shylla ka la ong ba ki kam jngohkai pyrthei ki ai ka lad kaba lah ban ïaineh na ka bynta ki lad kamai ha ka distrik.
“Ka kam jngohkai pyrthei ka dei kawei ka bynta kaba lah shisha ban thaw ïa ki lad kamai jakpoh na ka bynta ki briew jong ngi. Ki don katto-katne ki krem bad ki kshaid ha East Jaiñtia Hills ki bym pat lap na ka bynta ki kam jngohkai pyrthei. Nga la dep leh hi dalade ïa ka ‘Survey’ ryngkat bad ki briew shnong,” ka la ong.
Ka la pyntikna ba la pynkhreh ruh ïa ki jingtyrwa ban kyntiew ïa kine ki jaka.
“Hooid, ngi la pynkhreh katto-katne ki jingtyrwa na ka bynta ki kshaid ban kyntiew ïa ki kum ki jaka jngoh kai. Ngi dang ïaid shakhmat bad kane bad ngi kyrmen ba ngin ïoh katto-katne ka jingmang khnang ba ngin lah ban leh eiei na ka bynta ki paidbah ha kito ki shnong,” ka la ong.
Na ka liang ka MLA kam shym la treh ban pynpaw ïa kitei ki jaka.
“Ngam lah ban ai ïa ki kyrteng jong ki krem namarba kim pat rung hapoh ka thup ki kam jngoh kai pyrthei. Hooid, ki don ha East Jaiñtia Hills,” ka la ong.
Na ka liang ka MLA ka la wer ruh na ka bynta ban pynbha kyrkieh ïa ki jaka kiba la shah pynjulor na ka jingtih dewïong.
“Ngi la tyrwa katto-katne na kine ki jaka ba plie (open-cut areas) na ka bynta ban pynbha pat. Ynda ngi la ïoh ban pyntreikam ïa ki skhim ha kito ki jaka, ngin sa lah ban pyndep ïa ka jingpynbha bad ki briew kin ym don jingma nangne shakhmat,” ka la ong.
Halor ki jingtei, ka la ong ba ka surok Jowai-Malidor ka la nang manbha hynrei ka la maham ïa ki jingma kiba lah ban mih namar kane ka aïom slap.
“Nga kyntu ïa ki briew jong ngi ba kin long kiba phikir bha ha kum kane ka por, khamtam haba leit jingleit ha ka por mynmiet haba don u slap uba jur,” bynrap biang ka Kong Shylla.
