Shillong, Jylliew 29
U Myntri ka tnad ka koit ka khiah u Bah Wailadmiki Shylla ha ka lah Sngi u Blei u la ong ba ka tnad kam pat ïoh ïa kano-kano ka jingujor haba ïadei ka karkhana shna Ethanol kaba don ha Byrnihat bad kan sa lah ban sdang ïa ka kam tang ynda la ïoh ïa ka sakhi kaba biang halor ka jingktah jong ka ïa ka koit ka khiah.
“Ïa kaba mynta ngim pat ïoh ïa kano-kano ka jingujor. Ngi shu ïoh jingtip ïa kane tang na ki rynsan Social Media,” la ong u Bah Wailad haba kren sha ki nongthoh khubor.
U Bah Wailadmiki u la ïathuh ba haduh ban da ïoh ïa ki jingujor da ka jingthoh lane ki sakhi kiba biang ba ka ktah ïa ka koit ka khiah ka imlang sahlang, tang hadien kata ba ka tnad ka koit ka khiah kan sdang ïa ka jingtohkit.
U Bah Wailadmiki u la ong ba ka jingjaboh ha Byrnihat ka long ka mat kaba la slem bha, kane ka la mih naduh mynshwa bad ruh ka la mih ha ki lad pathai khubor ka Ri. Ka Byrnihat ka dei ka jaka khappud bad ka Assam bad ruh ka dang don ha ka jing?ïakren haba ïadei ka jingmih ka jaboh bad kiba bun ki karkhana ki don ha Assam.
Shuh-shuh u la ong ba dei namar kata ka daw ka la don ka jingïakren halor kane bad na kaei ka jaka ka mih ka jingjaboh. Hynrei la ïohi ba ka jingjaboh kam don pud bad ka jingshah ktah ka long ha baroh artylli ki Jylla.
U la ong ba u Myntri Rangbah ka Jylla u la pyntikna ba un shim ïa kane ka mat ha ryngkat bad ka Jylla Assam ban ïakren haba ïadei bad ka jingpynduna ïa ka jingjaboh. U la kdew ruh ïa ka jingtrei shitom ka Jylla ban ïakhun pyrshah ïa ki jingjaboh, da kaba ong ba dang ha ki katto katne sngi ka State Pollution Board ka la ïoh ïa ka khusnam na ka bynta ka jingtrei shitom ban pynduna ïa ka jingjaboh ha Byrnihat.
Ha kaba ïadei ka karkhana shna Ethanol, u Bah Wailadmiki u la ong ba kam pat ïoh ka jingtip kaba pura. “Ngam don ïa ka jingtip kaba biang shaphang kane ka karkhana namar ngi shu ïoh jingtip ïa kane tang ha kine ki khyndiat sngi,” u la ong.
“Namar ba ka khlem hap ha ka tnad jong nga, kam dei kaba bha ïa nga ban kren halor kane haba ngam pat tikna. Hynrei ka Byrnihat ka dei ka jaka khappud bad kata ka karkhana kan lah ban don ha Jylla Meghalaya ne Jylla Assam,” la ong u Bah Shylla.
