Jowai, Jylliew 29
Ka Jaiñtia National Council (JNC) Central Executive Committee bad ka Jaiñtia Students’ Union (JSU) Sengkmie ka la lum ïa ka jingïalang ba kyrkieh ha kaba ïadei bad ka mining projek ka Shree cement ha Lum Syrman Elaka Nong-khlieh East Jaiñtia Hills, ha ka 27 tarik Jylliew ha ophis treikam ka JNC, ha kaba la wan ban ïa shim bynta da ki trai jaka, ki nongrep, ki nongshong shnong ka shnong Daistong bad kiwei kiwei kiba na Elaka Nongkhlieh ha ryngkat ki dkhot jong ki ar seng.
Haba kren sha ki lad pathai khubor, u Presi-dent ka JNC Sambormi Lyngdoh u la ong ba hadien ka jingpynpulom ïa ka public hearing ka Shree cement da ki nongshong shnong ka Elaka Nongkhlieh, ka Hima Sutnga Youth Federation ka elaka Sutnga bad ka JNC, JSU, hynrei ka jingïaleh kam pat kut.
Shuh shuh ha ka jingïalang bad ki nongrep bad ki trai jaka ka elaka u la ong, ki ar seng kila shim ïa ka rai rangbah ban pynlong ïa ka jingïaid Rally ha sor Jowai ban tur sha ophis treikam ka JHADC, namar ba ka District Council la ai bor da ka 6th schedule ban ïada ïa ka khyndew ka shyiap hynrei kaba sngewsih ka long ba haduh mynta ka JHADC ka dang ïohthiah ha kane ka bynta. U la pyntip ba ka jingïakhih kan long ha ki ar bynta kata ban dawa ïa ka hok ki nongrep bad ki trai jaka bad ban dawa sloit noh ïa ka jinglong Dolloi jong u Dolloi ka Elaka Nongkhlieh namar ba u lah pynkheiñ ïa ki aiñ ki kyndon ka District Council.
U la ïathuh ruh ba ha ka jingïalang la ïakren sani bha, ha kaba la ïoh jingtip shuh shuh ba ym dei tang ka 217 hectares kaba ka Shree cement ka thmu ban leh ïa ka projek jong ka hynrei haduh 652 hectares, katba ka 217 kan dei tang ka phase 1. Ki nongshong shnong jong ka Elaka Nongkhlieh kila shah shet kylla ha ka Shree cement bad ki agent jong ka kiba don bynta lang bad ka Sorkar Jylla.
U la ong ha ka jingshisha kumba la ïathuh ba ïa ka cement plant la ïakut ha ka dorbar elaka ban shna ïa ka shabar jong ki shnong sha ka jaka kaba tip kum ka “Lum Ryngksan” hynrei la pynkheiñ ïa kane ka rai da kaba rah ïa ka plant hapoh ka shnong Daistong, kaba kham sngewsih ba ki nongrep ka shnong Daistong kila shah ktah bha ba wat ki lynti ïaid sha ki jaka rep ruh la shah pom noh na ka jingpyntrei ïa kata ka plant jong ka Shree cement.
Katkum ka jingïoh jingtip kaba pynlyngngoh ïa ki ar seng ba kumno ïa ki trai jaka kiba la don lypa ka ‘land holding’ ha lum Syrman, hynrei u Dolloi ka Elaka Nongkhlieh pat u register pynban ïa kita ki jaka hadien bad ka JHADC ruh ka kloi ban ai ‘land holding’ biang ïa kita, kane ka dei shisha ka jingïuhroit ïa ka hok ki nongshong shnong ka Elaka bad dei hangne la rai ban pynlong ïa ka jingïakhih ban kyrsiew thiah ïa ka JHADC.
U la ong lada phai ïa kaei kaba la jia bad ka case jong ka Shree cement la ïohi ba u Dolloi ka Elaka Nongkhlieh u la pynkheiñ lut ïa ki aiñ baroh jong ka district council. Na kane ka daw ka JNC, JSU bad ki nongrep, ki trai jaka ka Elaka Nongkhlieh kin tur sha JHADC ban dawa pynduh noh shisyndon ïa u Dolloi bad ban bishar ïa ka hok jong ki khun ka Elaka Nongkhlieh.
