Shillong, Naitung 01
Ki kam tuh kam thiem ki dang ïai bteng bad jur na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Ruby Kharbyngar u la ai ka jingujor ba ha ka 27 tarik Jylliew, 2026 ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-P-4005 na Mawlong Hat, Shillong.
Na ka liang jong u Anderson Talang u la ai ka jingujor ba ha ka 28 tarik Jylliew, 2026, ki runar bym lah ban ithuh ki la prong tuh hapoh ka ïing jong i ñia (aunt) jong u ha Nongrah, Nonglum, Shillong bad ban tuh ïa ki waiar, kawei ka grinder machine, ar tylli ki basin mixtures, kawei ka sink mixture, kawei ka cutter machine, kawei ka drilling machine, bad kiwei ki tiar ba shongdor kumba T.1.7 lak.
Ha kawei pat ka khubor, u Kompestar Kharlyngdoh u la ai ka jingujor ba ha ka 29 tarik Jylliew, 2026 ha ka por kumba 3.30 mynstep, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-T-9518 na Tynring (EKH).
Ha ka 29 tarik u Jylliew, 2026, ha ka por kumba 11 baje mynmiet, ki pulit ki la bat noh ïa uwei u Abdul Shah (24 snem) ryngkat bad ki waiar ilektrik ha Bomfyle Road, Shillong, ha kaba la suba ba u la tuh ïa kine.
Na ka liang jong ka Cicilia Sikiame G Momin ka la ai ka jingujor ba hapdeng ka 20 haduh 25 tarik u Jylliew, 2026, ki runar bym lah ban ithuh, ki la prong tuh hapoh ka ïing sah ka jong ka, kaba don ha Laban, Howell Road, Shillong bad ha kaba ki la pynjot pynpra ïa ki jingshna hapoh ka ïing.
U Gledison Marak u la ai ka jingujor ba ha ka 27 tarik Jylliew, 2026, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML08-C-0031 na Nazing Bazar, Tura (WGH).
Ha kawei pat ka khubor, u Iaikiewbha Rymbai bad Wellson Siangshai, Waheh Shnong bad Secretary Shnong jong ka Pamra, ki la ai ka jingujor ba ha ka 24 tarik Jylliew, 2026, ba ha ka por ba dang pynlong ka jingjurip ïa ka projek JJM Water Supply Scheme, ki la lap ba ki runar bym lah ban ithuh, ki la dep ban weng bad tuh ïa ki ‘GI pipe fittings, ki outlet connection bad kiwei ki tiar na ki pipeline kiba la pyndait ha katei ka shnong.
