Shillong, Naitung 01
U Symbud Myntri Rangbah ka Jylla Bah Sniawbhalang Dhar ha ka sngi Balang u la ong, ka Sorkar ba la ïalam da ka NPP ka dei ka Sorkar jong ki paidbah bad kam don por ban peit ïa ki jingkynthoh namar ba ka pynleit jingmut ha ki kam pynroi, da kaba kdew ïa ka palat T.15,000 klur ki projek ki dei kiba dang ïaid mynta ha ka jingpyntreikam ha New Shillong Township.
Ïa kane, u Bah Sniawbhalang u la pynpaw haba ai jingkren ha ka jingïalang pynkupburom kaba la pynlong da ka Joint Action Com-mittee ban ai khublei ïa ka Sorkar Jylla halor ka One Time Settlement (OTS) Scheme na ka bynta ki kali kamai. U Bah Sniawbhalang u la ong, “Kum u nongïalam jong phi, ngim sngeweiei wat lada ki paidbah ki kynthoh ïa ngi ha ki rynsan social media ne ha kiwei kiwei ki lad. Ngi don hangne ban shakri ïa phi. Ka Sorkar kaba ïalam da ka NPP ka dei ka Sorkar jong u paidbah.”
“Ki don bun kiba kren sniew pyrshah ïa ka Sorkar, hynrei ngi, ngim don por ban sngap ïa kine ki jingkynthoh sniew. Ngi bunkam ban trei na ka bynta ki paidbah ka Jylla. Ai ba kin kren katba ki sngew kwah ban kren, hynrei ngi don hangne ban trei na ka bynta ki paidbah bad ym ban sngap ïa ka jingkren ka bym don nongrim satia,” u la ong. U Symbud Myntri Rangbah u la ong, ka Sorkar ka ïeng ban pynleit jingmut ha kaban ai ka jingshakri ha baroh ki liang.
“Peit ïa ki kam kiba la leh da ka Sorkar NPP ha kine ki 8 snem kiba la leit. Kaei kaba ngim shym la leh? Lada ngi ïakren shaphang ka jingshna ïa ki surok, halor ka koit ka khiah, ka bording ilektrik, pule puthi bad hajan baroh ki tnad Sorkar, ka jingsam ïa ki kam pynroi kala long kaba mar katjuh,” u la ong.
Haba pynpaw ïa ka jingïaid ki kam ha New Shillong Township, u la ong, “Ngi dang tei ïa ka Administrative City bad ïa ka Knowledge City ha New Shillong Township. Mynta la bun snem, ngi la ïai bteng ban ïakren halor ka New Shillong Township hynrei kam shym la jia eiei pat. Ngam mut pat ban ong, ba ki Sorkar kiba la dep kim shym la treikam, hynrei ka Sorkar hapoh ka jingïalam ka NPP haba phi leit sha New Shillong phin sa ïohi ïa ki jingkylla kiba la sdang ban jia bad ïaid shakhmat mynta”.
“Palat ïa ka T.15,000 klur jong ki projek ki dei kiba dang ïaid mynta shakhmat katba nga dang kren. La shna ïa ki State Highways ha kine ki 8 snem kiba la dep,” ong u Bah Sniawbhalang.
Ha kaba ïadei bad ka OTS scheme, u la ong ba ka Sorkar kala shimkhia ban kyrshan ïa ki paidbah kiba don hapdeng jong ka jingeh. “Haba phi mad ïa ka jingeh kaba kum kane, ka dei ka kamram jong ka Sorkar ban ïarap ïa ki briew jong ka. Kumta ngi la pyntreikam ïa kane ka skhim bad ngi kyrmen ba kan pynmih ïa kiei-kiei kiba bha,” u la ong.
U la ong ba ka Sorkar ka dang khmih bniah ruh ïa ki jingsngewkhia kiba la pynpaw da ki briew kiba ïadonbynta ha ka liang ka jingpynkit ïa ki mar ki mata.
“Kala don ruh ka jingdawa ha kaba ïadei bad ki kali ki bym don ïa ki kot ki sla kiba biang. Ngi dang khmih bniah ïa kane ka mat. Ki la kyrpad ban shimkhia lem na ka bynta ki kali ki bym don ïa ki kot ki sla bad nga la ong ïa ki ba ngin sa khmih bniah ïa kane ka mat,” u la ong.
U Bah Sniawbhalang u la kyrpad ïa ka jingai ïa ka jingïatreilang bad ki ophisar bad ban jur ïa ka jingkongsan jong ki nongñiah trok. “Nga sngewthuh ïa kane ka mat bad nga kyntu ïa phi ban ïatreilang bad ki ophisar ki jong ngi. Kaei kaba ngi lah ban leh ngin leh beit bad ngi donkam ïa ka jingïatreilang khnang ba ka kam kan ïaid beit ïaid ryntih,” u la ong.
“Ki nongñiah trok ki long kiba kongsan bha ïa ka jylla. Khlem ma phi, ka Jylla jong ngi kan ym lah ban kiew. Khlem ka Trucker Association, ngi ngin ym lah ban pyndap pynbiang ïa ka jingdonkam jong ka Jylla bad ki paidbah,” u la ong.
Haba ïengskhem halor ka jingshimkhia ka Sorkar ïa ki mat kiba kongsan, u la ong, “Ki nongïalam ka NPP kila buh shwa hakhmat eh ïa ki paidbah ym ïa ka bor. Kane ka Sorkar kaba ïalam da ka NPP hapoh ka jingïalam u Conrad K Sangma. Phi la ïohi kumno ka
Jylla kala ïaid shaphrang ha kine ki 8 snem kiba la dep. Ngi la ïaid ha ka lynti kaba dei. Ai ba ki paidbah kin kren kat kaba ki sngew kwah ban kren, hynrei ngi ngin ym ïapeiñ pat ba kan ktah ïa ka bha ka miat jong ki paidbah,” u la bynrap.
Ha katei ka prokram, ki nongpynïaid kila pynkup burom ïa u Myntri Rangbah ka Jylla u Conrad K Sangma ryngkat bad ïa ki Symbud Myntri Rangbah ka Jylla u Bah Prestone Tynsong bad Bah Sniawbhalang Dhar ha ka ban ai jingithuh ïa ka kamram kaba kila leh na ka bynta ban pyntreikam ïa ka OTS scheme.
