Shillong, Naitung 01
U Chief Electoral Officer (CEO) ka Jylla, u Dr. B.D.R. Tiwari ha ka Sngi Balang u la ong ba la sam ïa 1,19,129 tylli ki ‘Enumeration Form’ ha kylleng ka Jylla ha ka sngi nyngkong jong ka jingleit rung sha man la ki thliew ïing hapoh jong ka Special Intensive Revision (SIR), 2026, kaba kynthup ïa 5.07% na ka jingdon jong baroh ki nongthep ‘vote’ ha ka Jylla.
Kane ka sienjam ka la sdang naduh ka 30 tarik u Jylliew ha kaba ki Booth Level Officer ki la leit jngoh ïa ki ïing ki sem ban sam ïa ki phom kumjuh ban pynshisha ïa ki jingtip ba bniah haba ïadei bad ka ilekshon kum shi bynta jong ka prokram ba la pynbna da ka Election Commission of India.
“Ka thong ba kongsan jong ka Special Intensive Revision (SIR) ka long ban pyntikna ba yn ym don uwei ruh u nongshong shnong uba dei hok u ban shah iehnoh shadien, katba ym dei ban don uwei ruh u bym dei hok u ban shah kynthup ha ka ‘Electoral Roll’,” la ong u Dr. Tiwari.
U la ïathuh ba ki don 3,551 ngut ki Booth Level Officer ha kylleng ka Jylla, ha kaba uwei-uwei u BLO un hap khmih ïa 662 ngut ki nongthep ‘vote’. Baroh ki BLO ki la ïoh jinghikai na ka bynta kane ka kam.
Nalorkata, la thung bad pyntbit shuh sa 60 ngut ki Electoral Registration Officer, 166 ngut ki Assistant Electoral Registration Officer bad 410 ngut ki BLO Supervisor ban khmih bniah ïa ka rukom treikam.
Ki nongthep ‘vote’ baroh ha Meghalaya ki long 23,49,645 ngut.
Haba ïadei bad ka jingïaid shakhmat jong kane ka kam katkum ki distrik, u Dr. Tiwari u la ong ba ka South West Garo Hills ka lam nakhmat ha kaba ka jingsam ïa ki ‘Enumeration Form’ ka long haduh 20.49%, bud sa ka North Garo Hills – 10.25%, South Garo Hills – 6.67% bad West Garo Hills – 6.5%. Ka East Khasi Hills, kaba don bun tam eh ki nongthep ‘vote’, ka la sam haduh 28,006 tylli ki phom, lane 4.43% na ki nongthep ‘vote’ jong ka haduh ka por 3 baje mynsngi jong ka 1tarik Naitung.
Ka jingpynshisha na kawei ka ïing sha kawei pat kan bteng haduh ka 29 tarik u Naitung.
Ha kane ka kylla, ki BLO kin ai ïa 2 tylli ki phorm bad kin wan lum biang ïa kawei ka kopi ba la pyndap hadien ba ki la pynbiang ïa ka jingpyntikna ïa kaba ar.
“Ym donkam ban ai ïa kino-kino ki kot ki sla ha ka por ba ïaid shakhmat bad kane ka kam,” ong u Dr. Tiwari.
Lada lap ba ka ïing ka khang tala, u BLO un ieh ïa ka phom bad un leit 3 sien ban leit shim ïa ka. Ki nongthep ‘vote’ ki don ruh ka lad ban thep ïa ki phom ‘online’ lyngba ka ‘ECINET Mobile App’ lane ka ‘Voter Services Portal’ ha voters.eci.gov.in, u la ong.
Ban ïarap ïa ki nongthep ‘vote’, ïa ka ‘Electoral Roll’ ba la rim jong u snem 2005 na ka SIR bakhatduh la buh ha ka ‘website’ jong u CEO, ki ‘portal’ jong ki bor distrik, ka ‘ECINET App’, bad ka ‘Voter Service Portal’. Ki BLO ki lah ban ïoh ruh ïa ka thup kyrteng jong u snem 2005.
“La bthah ïa ki nongthep ‘vote’ kiba paw kyrteng ha ka ‘Electoral Roll’ jong u snem 2005 ban thoh ïa ki jingtip ba ïadei, kata ka Kyrteng, Kyrteng bahaïing hasem, Kyrteng ka Jylla, Kyrteng ka distrik, ‘Assembly Constituency Number’, ‘Part Number’, bad ‘Serial Number’, shuwa ban pyndap ïa ka ‘Enumeration Form’,” ong u Dr. Tiwari.
U la bynrap ruh ba ki nongthep ‘vote’ kiba wan sah sha Meghalaya hadien u snem 2005 ki lah ban peit ïa ka SIR ba khatduh jong ka Jylla barim jong ki lyngba ka ‘Voter Services Portal’ lane ka ‘ECINET App’ ban ïoh biang ïa ki jingtip ba donkam.
Watla ym donkam ïa ki kot ki sla haba ïadei bad kane, hynrei dei ban tah ïa ka dur (passport) ba dang shen ha ka phom na ka bynta ban ‘upload’ ‘online’. Lada ka kyrteng jong u nongthep ‘vote’ kam don ha ka thup kyrteng jong u snem 2005 hynrei ka kyrteng jong ki kmie ki kpa ne ki mei-ieid-pa-ieid ka don, ïa kita ki jingtip lah ban pynbiang ha ka phom.
Na ka liang u Dr. Tiwari u kyrpad ïa ka jingïatreilang jong ki paidbah.
“La kyrpad ïa ki nongthep ‘vote’ ban ai ka jingïatreilang bad ki Booth Level Officer ha ka por ba ki wan jngoh, da kaba phikir bha ban pyndap ïa ki ‘Enumeration Form’, bad ban pynphai biang ïa ki phom ba la dep pyndap sha ki BLO hapoh ka por ba la buh,” u la ong.
“Ka ophis jong u CEO ka kyrpad ïa baroh ki nongthep ‘vote’ kiba dei hok ban ïashim bynta shitrhem ha ka Special Intensive Revision ban pyntikna ba ka ‘Electoral Roll’ kan long kaba beit ba ryntih, kaba pura bad kaba ïaid katkum ka juk mynta,” u la ong.
Ki nongthep ‘vote’ ki lah ban ïakynduh ïa ki BLO jong ki na ka bynta ka jingïarap. Ïa ki jingtip ba bniah la pyni ha ki jaka thep ‘vote’, bad lah ban buh por lyngba ka ‘ECINET App’, la bynrap u Dr. Tiwari.
