Jowai, Naitung 01
Ha ka 27 tarik Jylliew ha ka por kumba 8:30 mynmiet la lap ïa kawei ka metïap kaba la thiah lyngktar na ka jingshah ïuh ha ka kali ka bym lah ban tip ha Pamchyndat jong ka shnong Rymbai, East Jaiñtia Hills.
U Superintendent of Police ka East Jaiñtia Hills lyngba u kyrwoh u pyntip ba mar ïa ïoh jingtip, ka kynhun ki pulit na Ladrymbai OP ki la her mar mar sha katei ka jaka ba la jia na ka bynta ban pynlong ïa ka jingtohkit.
Hadien ba la wan poi ha kane ka jaka, la sakhi ïa ka metïap kaba thiah ha surok bad ka bym lah shuh ban ithuh namar ka jingshah ïuh na ki bynta jong ka khlieh.
Hadien ba la bishar bniah bad pyndep ïa ki jingdonkam katkum ka aiñ, la pynkynriah noh ïa kane ka met shapoh Civil Hospital, Khliehriat bad hadien la buh hapoh ka jaka buh metïap na ka bynta ka jingpynithuh bad ka jingwan shimti da ki bahaïing hasem. Na ka liang u SP u kyntu ïa ki paidbah ba kin wan shakhmat bad ban ai ïa kino-kino ki jingtip lada ki don ha kaba ïadei bad kane ka metïap lane ïa kiba haïing hasem jong u.
