Shillong, Naitung 01
Uwei u rangbah u la shah thok pisa haduh palat T.65 lak eiei tang namar ka jingkwah ban buh bad plie ïa ka dukan KFC ha Jowai, West Jaiñtia Hills.
Katkum ka khubor na ki pulit la ong ba uwei na ki nongshong shnong jong ka dong ha West Jaiñtia Hills u la ai ka jingujor ba ha ka 23 tarik Lber, 2026, u la phah ki jingkwah jingtip lyngba ka ‘online’ na ka bynta ban buh ïa ka dukan KFC ha Jowai (WJH), da u kpa jong u, lyngba ka website viz., ‘online.kfc.co.in’.
Shuh shuh ka khubor ki pulit ka la ïathuh ba ha ka 26 tarik Lber, 2026, u nongujor u la ïoh pdiang ïa ka phone call na uwei u Daya Shankar Mishra, uba la kam ba u dei u nongmihkhmat jong ka ‘Yum Restaurant India Pvt., Ltd., ka kompeni kaba peit bad pynïaid ïa ki dukan KFC ha India, bad ha kaba kham hadien la pynbud sa da ki bun tylli ki e-mails na u [email protected] bad ruh bun tylli ki phone calls na u Daya Shankar Mishra, ha kaba ïadei bad ki jingdonkam na ka bynta ban ïoh buh dukan KFC. La ong ba kham hadien, u kpa jong utei u nongujor u la phah ïa ka pisa kaba long baroh haduh T.65, 21,490/- sha ki account number ki bapher-bapher ha kiba bun ki bynta. Hynrei ha ka 25 tarik Jylliew, 2026, hadien ba u la ïoh pdiang ka jingpynshai na u ‘grievance officer’ jong ka KFC, une u nongujor u la sngewthuh ba u la shah thok.
