Jowai, Naitung 01
Ka shad Ñiam Behdeiñkhlam ka dei kawei na ki shad niam bna nam jong ka Rilum Jaiñtia kaba la pyndep shisien shisnem da ki khun ka Niamtre.
Kumta ka Dorbar Shnong Loomkyrwiang kum shibynta ka jingpynkhreh ïa ka jingwan jong ka shad Niam Behdieñkhlam hapoh ka Raij ka shnong ka ban sdang naduh ka 6 tarik haduh ka 9 tarik Naitung, ka la sdang ïa kiba bun ki kam naduh ka jingleit peit ïa ka Diengkhlam na khlaw na btab bad ka jingpynbit pynbiang ïa ki rot ki rong kaba long shibynta ka dak ban pynphuh pynphieng ïa ka sngi khatduh jong ka jingshad ha Syiem Aitnar.
Shuh shuh kaba kham kyrpang ha ka 27 tarik Jylliew ki khun ka dorbar shnong kila mih paidbah ban sait bad pynkhuid, ñiat rong ïa ki lynti syngkien, bad ka jingpynkhuid ïa ki tyllong umbam umdih. Kumba ka shad niam Behdieñkhlam ka dei ka por ba kyrpang bad kyntang kaba ka raij ka shnong kin pdiang ïa ka jingwan u Trekirot ha ki Saw sngi-Lai miet, kumta ka jingkhuid jingsuba ha ka manbriew longbriew, ha ïing ha sem kumjuh hapoh ka raij ka shnong ka dei kaba donkam bha.
