Shillong, Naitung 01
U MLA ka Sohra, Bah Gavin M. Mylliem ha ka Sngi Balang u la ong ba ka Sorkar Meghalaya ka la pyllait ïa ka sien-siew kaba lai bad ba khatduh jong ka song jingïarap (ba shisien) ba kyrpang ban khang ïa ka karkhana na ka bynta ki nongtrei ka Mawmluh Cherra Cement Limited (MCCL), da kaba pyndep ïa ka jingpynbeit kaba T.90 klur shisnem hashuwa jong ka por ba la buh.
“Hooid, ka Sorkar ka la pyllait ïa ka sien-siew kaba lai bad ba khatduh jong ka pisa kaba dei ban siew sha ki nongtrei ha ka taïew ba la dep, bad ka MCCL ruh ka la ïoh pdiang ïa kane ka pisa. Mynta ki dang don ha ka jingpynkhreh ban pyllait sha ki nongtrei ka MCCL,” la ong u Bah Gavin.
Ka Sorkar Jylla ka la pynbna ïa ka skhim khang sha ki nongtrei ka MCCL ha u bnai Kyllalyngkot, 2025, da kaba kular ban ai T.90 klur ha ki lai tylli ki sien-siew hapoh ki lai tylli ki snem mang tyngka.
“Ïa ka bynta banyngkong la pyllait ha u bnai Lber, 2025 – kumba T.36 klur, kaba long 40% na ka T.90 klur. Ïa ka bynta kaba ar la pyllait ha u bnai Naitung, 2025, kaba kot kumba T.27 klur, kaba long 30% na ka T.90 klur. Khatduh, mynta u bnai, ka Sorkar ka la pyllait ïa ka sien-siew kaba khatduh, kaba lai, kaba kot sha ka T.27 klur, kaba long kumba 30% na ka T.90 klur,” u la ong.
U Bah Gavin u la kdew ba ïa ka jingsiew pura la pyndep hapoh ar tylli ki snem mang tyngka ha ka jaka jong ki lai snem ba la kular.
“Hooid, ka Sorkar ka la kular ban pyndep ïa ka jingsiew baroh kaba T.90 klur hapoh lai tylli snem mang tyngka ha ki lai sien-siew. Hynrei ngi sngewkmen shibun ba ka Sorkar ka la pynkhuid lut ïa ka pisa kaba dei ban siew sha ki nongtrei ka MCCL tang hapoh ar tylli ki snem mang tyngka,” u la ong.
Ha kajuh ka por, u la ai khublei ïa ka Sorkar MDA kaba la pynkloi ban pyllait ïa kane.
“Kumta ngi sngewnguh shibun ïa ka Sorkar MDA hapoh ka jingïalam jong u Myntri Rangbah ka Jylla kaba la sngap ïa ka jingkyrpad jong ki nongtrei ban pyllait noh kloi ïa ka pisa baroh. Ka kdew shai ba ka Sorkar MDA ka dei ka Sorkar kaba bat la ki jingkular,” la ong u Bah Gavin.
U la bynrap ba la pynkhuid ruh ïa ki jingsiew kiba dang sahteng sha ki nong saplai jong ka MCCL.
“Nga sngewkmen ban pyntip ba baroh ki jingsiew kiba dang sahteng sha ki nong saplai jong ka MCCL, la ka long ki nongsam dewïong ne dew byrtha, kiba la sahkut la bun snem, la pyndep ha ka bynta kaba sdang jong une u snem mang tyngka,” u la ong.
U MLA u la ong ba kane ka jingmang pisa kan ïarap ban pynskhem ïa ka kamai jong ki nongtrei barim ka MCCL.
“Ka jingpyllait sha ki nongtrei ka MCCL kan pynlah ruh ïa ki ban pyndonkam hok ïa ka pisa ba ki la ïoh. Kane kan ïarap ban pyntikna ïa ka jingim kaba bha na ka bynta ki nongtrei ka MCCL,” u la bynrap.
