Shillong, Naitung 01
Ka Khasi Students’ Union (KSU) Shillong Mihngi Circle ha ka miet jong ka 30 tarik u Jylliew 2026 ka la ïoh ka jingtip ba don ki katto katne ki briew kiba long artatien kiba thiah ha surok ha 4th Furlong ha kaba ka seng ka la leit ban beh ïa ki.
Ka seng haba ka buh jingkylli bniah, kine ki bar jylla ki ïathuh ba ki wan sha kane ka Jylla ban bylla hynrei haba pan ïa ki kot ki sla ki jong ki ba ki dei ne em ki nong India, kim shym la don satia bad wat ka EPIC ruh kim don, kane ka la pynartaien ïa ka seng ba ïoh lehse kine ki briew ki wan ruh da ki jingthmu ba sha lyndet namar kim biang satia ki kot ki sla.
Ka seng mar mar ka la aiti ïa kine ki briew sha ki pulit ban leh ïa kaba donkam bad la maham ruh ïa ki briew kiba thmu ban long dalal ïa kum kine ki briew.
Ka seng kan ïai bteng ïa kum kine ki jingkhynra ha ki sngi ban wan ha kylleng ka bri u Hynñiewtrep.
Ka KSU ka pynpaw ba ka jingïohrung laitlan ki mynder ka dei bym don ki aiñ kiba khlaiñ ban teh lakam ïa ka jingrung kyrthep.
Shuh shuh ka KSU ka pynpaw ba ka ILP kaba dei kawei na ki aiñ kaba pyrkhing hynrei ka Sorkar kam i shimkhia namar ka MRRSA kaba la long aiñ naduh 2016 hynrei ym pat ïohi ïa ka jingtreikam pura, kaba sngewsih ka long ba wat ïa ki khyrdop (Felicitation centre) kaba dei ka bynta jong ka MRSSA 2016 ki thmu pynkylla pynban sha ka food court bad mano ban shim ka jingkitkhlieh haba wat ki bor jong ka aiñ ruh kim lah ban pyntikna ban phah biang ïa ki mynder ba ïoh bat da ka seng sha ki jaka ba ki wan.
