Shillong, Naitung 01
Ka Confederation of Meghalaya Social Organisations (CoMSO) ha ka 30 tarik u Jylliew 2026, ka la ïawer ïa ki kynhun ka jaidbynriew, ki sengsaiñ pyrthei, ki khlieh nongsynshar bad ïa ki nongshong shnong, ba kin ïashimbynta ha ka Special Intensive Revision (SIR) jong ka Electoral Roll, haba pynpaw ba ka SIR ka long kaba kongsan bha ha ka ban ïada ïa ka hok ki paid riewlum ha ka riti synshar bad saiñ pyrthei.
Ha ka kyrwoh ba la phah da u Chairman ka CoMSO, u Bah Roy Kupar Synrem, u la ban jur ba ka SIR ka kham long kongsan shuh-shuh, ban ïa ka jingkyntiew ïa ka thup kyrteng jong ki nongthep vote.
U la ong ba ym dei ban shim ïa ka SIR, kum ka jingleh ha ka ban pynbeit man la ka por ïa ka thup kyrteng hynrei kadei ka kabu kaba kham pher ban pynthikna, ba ka Electoral Roll kadei ban long kaba lait na ki bym dei hok ne ka jingpynrung kyrteng kaba artatien.
U la maham ruh ba ka jingshongsbai jong ka jingsynshar paidbah, kan shong eh ha ka jingdon ïa ka thup kyrteng kaba khuid.
“Ka jingkhuid jong ka Electoral Roll, kadei u paia jong ka kam synshar paidbah. Lada la ïapeiñ noh ïa ka Electoral Roll, ka jingshong shngaiñ jong ka jingtreikam jong ka jingsynshar paidbah kan shah pyntlot bor noh” la ong u Bah Roy Kupar Synrem.
Katkum ka jingpynpaw ka CoMSO, ki kynhun jong ka jaidbynriew ki la ïai bteng ban pynsngew ïa ka mat jong ka jingwan rung be-aiñ jong ki briew kiba nabar, ka jingkylla jong ka rukom long rukom man bad ka jingdon ki kyrteng kiba artatien kiba mih ha ka Electoral Roll.
