Shillong, Naitung 02
Hadien ba ki bor District ka East Khasi Hill ki la pynbna ba ki Booth Level Officer (BLOs) ki dei ban leit sam ïa ki ‘Enumeration Form’ sha man la ki thliew ïing, kaba long ka jingpyntreikam ïa ka SIR, hynrei ha ka Sngi Palei ka Khasi Students’ Union Mawprem Circle ka la ïoh jingujor na ki paidbah ba ki BLO ki sam ïa ki phorm ha lynti bad ki surok.
Ka KSU Mawprem Circle ha ka jingïalam u samla Pynshngaiñ Lyngdoh Lyngkhoi kum u Vice-President mar ïa ïoh jingtip ki la leit ban tuklar halor kane bad la kynnoh ruh ba ki BLO ki la sam ïa ka Form ha kawei ka ïing jong u MLA barim ka West Shillong Constituency bad ki la sam paidbah ha surok kaba la pynsuba sniew ba ka don kaei-kaei sha lyndet.
U Samla Pynshngaiñ u la kynnoh ba ki BLO ki la ïaid lait bad pynkheiñ ïa ki kyndon katkum ba la bthah da ka Election Commission of India, namar ki khlem leit rung ha man la ki thliew ïing jong ki nongshong shnong, hynrei ki la shu sam ha ki surok bad ki phyllaw ïing briew.
U la ong ba ki BLO ki dei kiba la ïoh ka jinghikai, hynrei ki dang ïaid lait kumne bad u la kynnoh kane ka lah ban dei ka buit ban ïohnong sengsaiñ pyrthei jongno re jongno.
Haba ïoh ban ïakren bad ki nongpynïaid shnong ka Nongsohphoh Upper Mawprem ki la pynpaw ba ka jingleh jong ki BLO ka long da khongphong ïa kaba la bthah bad pynthikna ba ka don shisha kata ka jingsam ïa ki ‘Enumeration Form’ ha ki surok bad kynnoh ruh ba ki BLO ki khlem ai kano-kano ka jingpynshai ne pynsngewthuh ïa ki paidbah nongshong shnong kumno ban pyndap ha ka phorm.
U Rangbah Shnong ka Nongsohphoh u Bah Hardy Ryntathiang haba ïakren u la ïathuh ba u la maham ïa ki BLO ba ki dei ban shim biang ïa ki ‘Enumeration Form’ ba ki la sam bad kyntu ba ki dei ban leh kumba la bthah ba kin leit rung ha man la ki thliew ïing ban sam ïa ki phorm.
Haba bynrap u Chairman ka Dorbar Shnong u Bah Johny Kharmawlong u la ong ba kane ka jingleh ki BLO ka long kaba be-aiñ, kaba ym ïahap satia bad ka Dorbar Shnong kan ym pdiang ïa kane ka jingleh.
